क्यान इन्फोटेकमा एक लाखले गरे अवलोकन

काठमाडौं- राजधानीको भृकुटीमण्डपमा जारी सूचना प्रविधि मेलाको दुई दिनमा एक लाखभन्दा बढीले अवलोकन गरेका छन्। कम्प्युटर एसोसिएसन नेपाल (क्यान) महासंघले माघ १५ गतेदेखि आयोजना गरेको २५औं संस्करणको क्यान इन्फोटेक २०१९ मा अवलोकनकर्ताले उत्साहजनक सहभागिता भएको जनाएको हो।

‘सुबिसु क्यान इन्फोटेक २०१९ इन एसोसिएसन विथ ईसेवा’ नाम दिइएको मेलामा सूचना तथा सञ्चार क्षेत्रका नौला प्रविधि र उपकरणका साथै नयाँ-नयाँ सफ्टवेयर, सुरक्षा उपकरण र नेपाली प्राविधिकले विकास गरेका प्रविधि प्रदर्शनीमा राखिएका छन्।

बुधबारदेखि शुरु भएको मेलामा ‘रोबोट ब्याटल कम्पिटिसन’मा अवलोकनकर्ताको विशेष आकर्षण देखिएको छ। मेलामा रहेको रोबोटिक्स जोनमा अन्तिम दिन माग २० गतेसम्म रोबोट ब्याटल कम्पिटिसन हुनेछ। प्रतिस्पर्धामा मावि, उच्च मावि तथा इन्जिनिरिङ कलेजका विद्यार्थीले बनाएका रोबोटबीच ब्याटल कम्पिटिसन हुने बताइएको छ।


कुल १७५ स्टल रहेको मेलामा हार्डवेयर सेल्स तथा मेन्टिनेन्स, पावर सोलुसन्स, मोबाइल एसेसोरिज, डिलर र डिस्ट्रिव्युटर्स, इन्टरनेट सेवाप्रदायक, टेलिकम्युनिकेसन्स, आईसिटी कलेज तथा ट्रेनिङ इन्स्टिच्युट, सफ्टवेयर सोलुसन्स, पेमेन्ट सोलुसन्स लगायतका स्टल छन्। 

मेला अवलोकनका लागि सर्वसाधारणलाई प्रवेश शुल्क १०० रुपैयाँ र विद्यार्थीलाई ५० रुपैयाँ तोकिएको छ।