मेस्सी, स्वारेज र डेम्बेलेको गोलमा बार्साको शीर्षस्थान कायमै

एजेन्सी- स्पेनिस ला लिगा फुटबलमा बार्सिलोना आफ्नो शीर्षस्थान कायमै राखेको छ । आइतबार राति भएको खेलमा लेगानेसलाई ३-१ गोल अन्तरले पराजित गर्दै लिगमा शीर्षस्थान कायमै राखेको हो । 

बार्सिलोनाको जितका लागि उसमान डेम्बेले, लुइस स्वारेज र लियोनल मेस्सीले समान एक एक गोल गरे । यस खेलमा टोलीका नियमित कप्तान मेस्सीलाई पहिलो रोजाईमा राखिएको थिएन् । उनी खेलको दोस्रो हाफमा मैदान प्रवेश गरेका थिए ।  

पहिलो हाफमा १-० को अग्रता दिलाउन बार्सिलोनाका लागि खेलको ३२औं मिनेटमा उसमान डेम्बेलेले सुरुआती गोल गरे । उनले अर्थुरको पासमा वान टचमै बललाई पोस्टको दिशा दिए । 

खेलको ५७औं मिनेटमा लेगानेसका लागि मार्टिनले गोल गर्दै खेल १-१ को बराबरीमा ल्याए । तर, खेलको ७१औं मिनेटमा स्वारेजले गोल गर्दै बार्सिलोनालाई पुनः अग्रता दिलाए । 

दोस्रो हाफको इन्जुरी समयमा कप्तान मेस्सीले गोल गरेपछि खेल बार्सिलोनालाई ३-१ को जित दिलाए । दुबै टोलीको पहिलो भेटामा लेगानेसले आफ्नो घरमा बार्सिलोनालाई २-१ को परासजतट गरेको थियो । 

यस जितसँगै बार्सिलोनले दोस्रो स्थानको एथलेटिको मड्रिडभन्दा ५ अंकको अग्रता बनाएको छ । बार्सिलोनाले २० खेलबाट ४६ अंक जोड्दा दोस्रो स्थानको एथलेटिकोको ४१ अंक रहेको छ ।