काठमाडौं- नेकपा माओवादी केन्द्रका अध्यक्ष पुष्पकमल दाहाल‘प्रचण्ड’ले अफगानिस्तानमा रहेका नेपालीको सुरक्षा र उद्धारमा अविलम्ब प्रभावकारी कदम चाल्न सरकारसँग आग्रह गरेका छन्। एक विज्ञप्ति जारी गर्दै अध्यक्ष प्रचण्डले यस्तो आग्रह गरेका हुन्।
उनले दक्षिण एशियाली मुलुक अफगानिस्तानमा विकसित पछिल्लो राजनीतिक घटनाक्रमप्रति आफू र आफ्नो पार्टीको गम्भीर ध्यानाकर्षण भएको समेत जनाएका छन्।
‘यस आपातकालीन अवस्थामा सर्वाधिक महत्वको कुरा त्यहाँ रहेका नेपालीहरुको सुरक्षा र ऊद्दार हो, परिस्थितिलाई मध्यनजर गर्दै सरकारले अविलम्ब प्रभावकारी कदम चालोस्,’ उनले भनेका छन्,‘यसका लागि मेरो व्यक्तिगत एवं पार्टीको तर्फबाट आवश्यक सम्पूर्ण पहल र सहयोग हुने पनि जानकारी गराउँदछु।'