पृथ्वी जयन्तीमा ज्ञानेन्द्रले दिए धम्कीपूर्ण सन्देश

काठमाडौं- पूर्वराजा ज्ञानेन्द्र शाहले पृथ्वी जयन्ती तथा राष्ट्रिय एकता दिवसको शुभकामना दिएका छन् ।

उनले एक सन्देश जारी गर्दै पृथ्वीनाराण शाहलाई भुलेकै कारण मुलुक अहिले सकसपूर्ण र कपटपूर्ण अवस्थामा गुज्रेको बताएका छन् । 

देशलाई एक बनाउने र राष्ट्र निर्माण गर्ने व्यक्तिलाई भुलेर मुलुक उभो नलाग्ने उनको भनाइ छ । उनले शुभकामना सन्देशमा लेखेका छन्, ‘एउटा स्वतन्त्र राष्ट्रको सबैभन्दा महत्वपूर्ण क्षण, राष्ट्र निर्माणकै दिन हो । राष्ट्र निर्माणमा बलिदान गर्ने तमाम वीर वीरङ्गना एवम् सपुतहरुको उत्सर्ग हामी कहिल्यै भूल्न सक्दैनौं र हुँदैन ।’

उनले घुमाउरो शैलीमा पृथ्वीनारायण शाहलाई बिर्सिने र राजतन्त्र हटाएउने जस्ता काम गरेकै कारण मुलुक समस्यै समस्याको भूमरीमा फसेको बताएका छन् । 

उनले शुभकामना सन्देशमा लेखेका छन्– राष्ट्र निर्माण गर्ने वीर वीरङ्गनालाई भुलेर, अलमलिएर र आफ्नै अस्तित्व बोधबाट विस्मरण गर्दा देश यतिबेला सकसपूर्ण र कपटपूर्ण अवस्थाबाट गुज्रिएको छ ।’ उनले राष्ट्र निर्माण गर्ने मान्छे कुनै वाद वा विचार हुन नसक्ने बताएका छन् ।