काठमाडौं- धादिङको बैरेनीमा गएराति बस र ट्रक आपसमा ठोक्किँदा एक जनाको ज्यान गएको छ। दुर्घटनामा परी १२ जना घाइते भएका छन्।
राति २ बजे बा३ख ४०१४ नम्बरको बस र भारतीय नम्बर प्लेटको ट्रक ठोक्किँदा सोलुखुम्बुको महाकुलाङ गाउँपालिका-३ की २७ वर्षकी रेनुका कुलुङको ज्यान गएको प्रहरीले जनाएको छ। घाइते भएकी कुलुङलाई उपचारका लागि राष्ट्रिय ट्रमा सेन्टर काठमाडौं ल्याइएकोमा उनको उपचारकै क्रममा ज्यान गएको हो।
यस्तै, दुर्घटनामा बसका चालकसहित १२ जना घाइते भएका छन्। घाइते १२ जनामध्ये चार जनाको अवस्था गम्भीर छ। प्रहरीका अनुसार ९ जनाको राष्ट्रिय ट्रमा सेन्टरमा नै उपचार भइरहेको छ। अन्य तीन जनाको गल्छीमा रहेको बुढीगण्डकी अस्पतालमा उपचार भइरहेको प्रहरीले जनाएको छ।