काठमाडौं- इंग्लिस प्रिमियर लिग (ईपीएल) को प्रिसिजन फुटबलअन्तर्गत मंगलबार राति सम्पन्न खेलमा चेल्सी र म्यानचेस्टर सिटीले जित हासिल गरेका छन्। प्रिसिजनको पहिलो मैत्रीपूर्ण खेलमा साविक विजेता सिटीले प्रेस्टोन नर्थ इन्डलाई २–० गोले हराएको हो।
सिटीका लागि रियाद महरेजले पहिला हाफमा फ्रि किकमार्फत् गोल गरेका थिए। त्यस्तै, दास्रो हाफमा युवा खेलाडी साम एडोजीले एक गोल थप्दै दुई गोलको अग्रता बनाएका थिए।
सोही अग्रताका साथ सिटीले खेल जित्यो। जारी अन्तर्राष्ट्रिय विन्डोको युरो कप र कोपा अमेरिकापछिको खेलमा सिटीको टिममा सिनियरमध्येका रियाद महरेज मात्र थिए।
त्यस्तै, अर्को खेलमा चेल्सीले बर्नेमाउथलाई २–१ गोलले हराएको छ। एक गोलले पछि परेको अवस्थाबाट चेल्सीले पुनगरागमन जित निकालेको हो।
पुनरागमनका लागि अर्मान्डो ब्रोजा र इके उग्बोले गोल गरेका थिए। त्यसअघि ६६औं मिनेटमा इमिनियानो मार्कोन्डेसले गोल गर्दै बर्नेमाउथलाई अग्रता दिलाएका थिए।