इटहरी- हिउँद सुरु भएसँगै सुरु हुन्छ पिकनिक सिजन । प्रदेश १ को पिकनिक सिजनमा पूर्वी तराई क्षेत्रका पिकनिक स्पटहरू धेरै लोकप्रिय छन् । राजमार्गले छुने र समथर भूभागका पिकनिक स्पटहरू भएकाले तराईका पिकनिक स्पटहर धेरै चल्छन् ।
सडक यातायातको सुविधा विस्तार भएसँगै पूर्वका तराई क्षेत्रका मात्रै हैन पहाडी क्षेत्रका पिकनिक स्पट पनि चल्न थालेका छन् । पहाडी क्षेत्रमा सडक पुगेपछि त्यहाँ नयाँनयाँ पिकनिक गन्तव्य बनेर तराई क्षेत्रका पिकनिक पारखीहरु पनि पहाडको भ्रमणमा जान थालेका छन् । यी पूर्वी पहाडका तराई क्षेत्रबाट एकै दिनमा पिकनिक खाएर आउन सकिने सात सुगम पिकनिक स्पट -
कन्यामइलाम जिल्लामा रहेर मेची राजमार्गमै छोएर बसेको कन्याम पूर्वी पहाडको लोकप्रिय पिकनिक स्पट हो । ढकमक्क हरियाली चियाबारी भएको यो पिकनिक स्पटमा नेपाल मात्रै हैन इलामसँग सिमाना जोडिएका भारतीय भूमिबाट पनि पर्यटक आउने गर्छन् । पिकनिक, घोडचढी र चित्ताकर्षक दृश्यावलोकनका लागि कन्याम लोकप्रिय छ । पूर्वी तराई र मेची पहाडी दुवै क्षेत्रका आन्तरिक पर्यटकका लागि कन्याम राम्रो पिकनिक स्पटका रूपमा धेरै समयदेखि लोकप्रिय छ ।
माईपोखरीइलाम बजारबाट १५ किलोमिटर उत्तरी क्षेत्रमा अवस्थित माईपोखरी इलामको अर्को महत्त्वपूर्ण पिकनिक स्पट हो । समुद्री सतहबाट २१३० मिटरको उचाइमा रहेको यो पोखरी वनस्पति, चराचुरुंगी, जलचर र थलचर मात्रै हैन आकर्षक प्राकृतिक बनावटका कारण पनि चर्चित छ । करिब १८८ हेक्टर क्षेत्रफलमा फैलिएको यो पोखरीमा नेपाल तथा भारतका पर्यटक घुम्न, पिनकिन खान र अध्ययन अवलोकन गर्न आउने स्थानीय बताउँछन् । नौ कुना रहेको यो पोखरी धार्मिक आस्थासँग पनि जोडिएको छ । दुई हेक्टर सीमसार रहेको यो पोखरीका नौ कुनामा नवदुर्गाको बास रहेको विश्वास छ ।
जोरपोखरी पाँचथर र ताप्लेजुङ जिल्लाको सिमानामा रहेको यो पोखरी मेची राजमार्गमै छोएर बसेको छ । सँगसँगै दुई पोखरी रहेकाले जोरपोखरी भनिएको हो । ताप्जेजुङको पाथीभरा जाँदा र आउँदा यो पोखरीमा दर्शन नगरेमा तीर्थयात्रा अपुरो हुने धार्मिक विश्वास यो पोखरीसँग जोडिएको स्थानीय बताउँछन् । पाँचथर सदरमुकामबाट ३९ किलोमिटरको सडक दुरीमा रहेको जोरपोखरी क्षेत्रमा पिकनिक गर्ने, पूजा गर्ने र घुमघाम गर्नेहरुको बाक्लो उपस्थिति हुन्छ ।
शिवगंगा मन्दिर, हिलिहाङ दरबार र ताङसाङजुङ डाँडाजस्ता अन्य महत्त्वपूर्ण धार्मिक, पुरातात्त्विक तथा प्राकृति गन्तव्य पनि यो पोखरी नजिकैका गन्तव्य भएकाले पनि यो क्षेत्रमा राम्रो आवागमन हुने गर्छ । धेरै पर्यटकीय महत्व बोके पनि यो क्षेत्रमा राम्रो लज भने व्यावसायिक सञ्चालनमा आँउन बाँकी छन् । गाडीमा आएकाहरुले फिदिम वा ताप्लेजुङमै गएर बास बस्नुपर्ने हुन्छ ।
भेडेटारसुनसरी र धनकुटाको सिमानाका पहाडी टुप्पोमा टुसुक्क बसेको पूर्वकै सबैभन्दा व्यस्त हिलस्टेसन हो भेडेटार । समुद्री सतहबाट १४३० मिटरको उचाइमा रहेको भेडेटारमा बेलायती राजकुमार चाल्र्सले पाइला टेकेको डाँडामा चाल्र्स प्वाइन्टसमेत बनाइएको छ । धरान बजारबाट १७ किलोमिरटको नागबेली पिच बाटो भएर पुगिने भेडेटारबाट मकालु, कञ्चनजंगा र सगरमाथाजस्ता विश्वका सर्वोच्च शिखरहरू मात्रै हैन पूर्वी तराईका हरियाली फाँटसमेत देख्न पाइन्छ ।
भेडेटार नजिकै नमस्ते झरना, सिएनएनले विश्वमा कम चर्चामा आएका उत्कृष्ट गन्तव्य भनेको नाम्जे गाउँ र पूर्वका सबै जिल्ला सदरमुकाम देखिने भनिएको ध्वजेडाँडा आदि अन्य महत्त्वपूर्ण पर्यटकीय गन्तव्य छन् । आकर्षक होटलहरु भएको भेडेटार पिकनिक खानेहरुका लागि मात्रै हैन साना–मझौला आकारका सभासेमिनार गर्न पनि लोकप्रिय स्थल हो ।
राजारानीभेडेटारबाट २० किलोमिटरको दुरीमा रहेको धनकुटाको राजारानी आकर्षक भूबनोट र सुन्दर तालको कारण चर्चामा छ । खसगरी पूर्वी तराईका पिकनिक पारखीले राजारानीलाई गन्तव्य बनाइरहेका छन् । राजारानीमा रानी ताल र कली झरना जस्ता आकर्षक गन्तव्यहरू भएकाले पनि यो क्षेत्रमा घुमघाम गर्नेहरु बाक्लिएका छन् । खदमराजा र खदमरानीले प्राचीन कालमा बसेर राज्य गरेकाले राजारानी नामकरण गरिएको विश्वास छ ।े यो क्षेत्रमा पिकनिक आउने, जैविक अध्ययन गर्ने र होमस्टे गर्नेहरुको संख्या बढ्दो भएको स्थानीय कमल राई बताँउछन् ।
संसारीमाई सीमसारधनकुटाको पाख्रीबास नगरपालिका ४ मा आकर्षक बुद्ध मूर्तिको निर्माण गरिएपछि संसारीमाई सिमसारमा आवागमन बढेको छ । धनकुटाबाट भोजपुर र संखुवासभामा जाने सडकमार्गको ‘गेटवे’ को रूपमा रहको पाख्रिबासमा साढे २७ फिट अग्लो बुद्ध मूर्ति बनेपछि यहाँको पर्यटकीय चहलपहल बढ्ने मूर्ति निर्माण समितिका अध्यक्ष ज्ञानु गुरुङले बताए । पाख्रीबास बजारबाट पाँच मिनेटको पैदलमार्गमा पुग्न सकिने संसारीमाई सीससार क्षेत्रमा पिकनिक खानेहरु बर्सेनि बढ्दै गएका छन् ।
२५ रोपनी क्षेत्रफलमा फैलिएको संसारीमाई सीमसार क्षेत्रमा वार्षिक ५० वटा गाडीमा पाँच हजार हाराहारी पिकनिक खान आउने आगन्तुक यो बुद्धमूर्ति बनेपछि झनै बढ्ने स्थानीयको भनाइ छ । दुईवटा मझौला र दुईवटै साना पोखरी भएको उक्त सीमसारमा आफ्नै पानीको मुहान र चिया बगान पनि छ । पैदलयात्रीले हिँड्ने आकर्षक टायलमार्ग पनि भएकाले पिकनिक पारखीका लागि संसारीमाई सिमसार आकर्षक गन्तव्य बनेको छ ।
वसन्तपुरनेपाली राष्ट्रिय फूल हो गुराँस र गुराँसको राजधानी हो संखुवासभा, तेह्रथुम र ताप्जेजुङका तीनजुरे, मिल्के र जलजले क्षेत्र । र, यी सबैको केन्द्र बिन्दुमा रहेको कोसी पाहाडको सुगम बजार हो वसन्तपुर । समुद्री सतहबाट २३२३ मिटरको उचाइमा रहेको वसन्तपुर सडकमार्गबाट तेह्रथुम सदरमुकाम म्याङ्लुङ बजारबाट २४ किलोमिटरको पूर्वमा छ । धरानबाट ८९ किलोमिटरमा रहेको वसन्तपुरमा आकर्षक आरआर गोर्डन छ ।
रक (पत्थर) र रोडोडेन्ड्रोन (गुराँस) को नामबाट यसको नाम आरआर गार्डेन भएको स्थानीय पर्यटन अभियन्ता तथा प्रदेश एकका प्रादेशिक सांसद लक्ष्मण तिवारी बताँउछन् । गुराँसको राजधानी क्षेत्र भएकाले वसन्तपुर क्षेत्रलाई लालीगुराँस नगरपालिका भनेर नामाकरण गरिएको छ ।
वसन्तपुर गुराँस अध्ययन गर्न आउने र हिमपातको सिजनमा हिउँ खेल्न आउनेहरुको लोकप्रिय गन्तव्य हो । पक्की सडक भएर जान सकिने वसन्तपुरबाट नजिकै गुफापोखरी, तिनजुरे तथा मेन्छ्यायेम पर्वत पनि नजिकै पर्छ । पूर्वी तराईबाट एकै दिनमा ओहोरदोहोर गर्न मिल्ने वसन्तुपुरमा घुम्ने र पिकनिक खानेहरु गुराँस फुल्ने माघ फागुनमा धेरै हुन्छन् ।
प्रकाशित: Dec 31, 2017| 18:23 आइतबार, पुस १६, २०७४