उत्कृष्ट युवा खेलाडीलाई ‘मणि विक्रम शाह युवा खेलाडी अवार्ड’ प्रदान गरिने 

काठमाडौं- सहिद स्मारक ‘ए’ डिभिजन लिगमा उत्कृष्ट प्रदर्शन गर्ने युवा खेलाडीलाई ‘मणि विक्रम शाह युवा खेलाडी अवार्ड’ प्रदान गरिने भएको छ ।

 राष्ट्रिय टोलीका पूर्व कप्तान स्वर्गीय मणि विक्रम शाहको स्मृतिमा अखिल नेपाल फुटबल संघ (एन्फा)ले विज्ञप्तिमार्फत उक्त पुरस्कार प्रदान गरिने जनाकरी दिएको हो । 

‘मणि विक्रम शाह युवा खेलाडी अवार्ड’ प्राप्त गर्ने खेलाडीले १ लाख प्राप्त गर्नेछ । नेपाली फुटबललाई माथि उठाउन निकै नै महत्वपुर्ण भुमिका खेलेका शाहको यसै बर्ष उपचारको क्रममा निधन भएको थियो । 

सन् १९९३ मा दक्षिण एसियाली फुटबलमा नेपालले स्वर्ण जित्दा उनले गरेको फ्रिकिक गोलको चर्चा अहिले पनि उत्तिकै छ । उक्त फाइनलमा २-१ ले पछि परेको अवस्थामा मणिले खेल सकिन ३० सेकेण्ड बाँकी रहँदा फ्रिकिकमार्फत लोभलाग्दो गोल गरेपछि नेपालले भारतलाई बराबरीमा रोक्दै पेनाल्टी सुटआउटमा भारतलाई पराजित गर्न सफल भएको थियो । 

नेपाली टिमबाट सन् १९८५ बाट १९९८ सम्म ४८ खेल खेलेका मणिको नाममा अन्तर्राष्ट्रिय ६ गोल रहेको छ । जुन नेपाली फुटबलमा उनलाई सम्झना दिलाउने धेरै सफलता मध्येको एक हो ।