पाँच सहमहामन्त्री थप्‍ने सहमतिपछि महासमिति चल्यो

काठमाडौं-नेपाली कांग्रेसमा पाँच सहमहामन्त्री थप्ने सहमति भएपछि अवरुद्ध महासमिति बैठक सुरु भएको छ। पार्टी सभापति शेरबहादुर देउवा, वरिष्ठ नेता रामचन्द्र पौडेल र पदाधिकारीसहित पार्टी केन्द्रीय कार्यालय सानेपामा बसेको अनौपचारिक छलफलमा पदाधिकारीको संख्या १४ पुर्‍याउने सहमति भएसँगै महासमिति बैठक सुरु भएको हो । 

शुक्रबार बिहान ११ बजेका लागि बोलाइएको बैठक विधान संशोधन मस्यौदा समितिको प्रतिवेदनमा सहमति नजुटेपछि साढे ११ बजे सुरु भएको केन्द्रीय सदस्य हृदयराम थानीले नेपाल समयलाई जानकारी दिए । 

पार्टी संस्थापन पक्ष सभापतिलाई मनोनितको अधिकार धेरै दिनुपर्ने र पदाधिकारीसमेत मनोनित हुनुपर्ने अडानमा र संस्थापन इत्तर पक्षका केन्द्रीय सदस्यहरु निर्वाचनको पक्षमा उभिँदा प्रतिवेदनमा सहमति हुनसकेको थिएन । 

दुवै पक्षबीच मंगलबार साँझ बसेको अनौपचारिक बैठकमा सभापति एक, उपसभापति दुई, महामन्त्री दुई, र सहमहामन्त्री दुई जना निर्वाचित गर्ने र प्रवक्ता र कोषाध्यक्ष सभापतिले मनोनीत गर्ने सहमति भएको थियो । तर, बुधबार बिहान बसेको केन्द्रीय कार्यसमितिको बैठकमा सभापति पक्षधर केन्द्रीय सदस्यहरुले पदाधिकारीको चयन गर्दा समावेशी र समानुपातिक प्रतिनिधित्व नभएको भन्दै आपत्ति जनाएपछि सहमति भाँडिएको थियो । 

बिहीबार सहमति जुटाउनका लागि भएका आन्तरिक र गुटगत छलफलसमेतले निकास नदिएपछि शुक्रबार बिहान भएको अनौपचारिक छलफलले समावेशी प्रतिनिधित्व सहमहामन्त्रीमा गराउने सहमति भएको छ । 

जसअनुसार सात जना सहमहामन्त्रीको चयन समावेशी आधारमा महिला, आदिवासी जनजाति, मधेशी, दलित र खुल्ला प्रतिस्पर्धाबाटै गर्ने सहमति भएको छ । 

समावेशी महामन्त्री बनाउँदा थारु र मुस्लिम वर्गबाट प्रतिनिधित्व गराउने वा नगराउने निर्णय अब केहिबेरमा बस्ने केन्द्रीय कार्यसमितिले गर्नेछ । यसअघि नै केन्द्रीय कार्यसमितिको आकार एक ६१ हुने सहमति भइसकेको छ ।