काठमाडौं- नेपाली राष्ट्रिय क्रिकेट टोलिका ‘शक्ति द पावर’ नामबाट चिनिने भेट्रान बलर शक्ति गौचनले क्रिकेटबाट सन्यास लिएका छन् । राजधानीमा जारी तेस्रो संस्करणको एभरेष्ट प्रिमियर लिग (इपीएल) टी-२० क्रिकेटमा शनिबार चितवन टाइगर्सविरुद्ध मैदान उत्रदै क्रिकेटबाट सन्यास लिएका हुन् ।
ईपीएल क्रिकेटमा पोखरा राईनोजबाट खलेका शक्तिले चितवनविरुद्ध अन्तिम खेल खेलेका हुन् । शक्तिले नेपाली राष्ट्रिय टोलीबाट भने यसअघि नै सन्यास लिएका थिए ।
सन् २००२ मा सिनियर राष्ट्रिय टोलीमा डेब्यु गरेका शक्ति नेपाली क्रिकेटले जुन उचाइ प्राप्त गरेको छ, त्यसका अभिन्न अंग हुन् । नेपालले हात पारेका हरेक उपाधिमा शक्तिले आफ्नो उपस्थीति बलियो देखाएका थिए ।
इन्डियन प्रिमियर लिग क्बल राजस्थान रोयल्समा शक्ति ट्रायल दिन गएको विषय निकै चर्चित बनेको थियो । सन् २०१४ को आईसिसी टी-२० विश्वकपमा शक्तीले गरेको प्रदर्शनलाई लिएर उनले शक्ती ‘द पावर’ कै उपमा पाएका थिए ।
सन् २०१२ मा भएको आईसिसी टी-२० विश्वकपको विश्वस्तरको छनोटमा १६ विकेट लिएर प्रतियोगिताकै सर्वाधिक विकेट लिने खेलाडीको सुचीमा दोस्रो स्थानमा रहेका शक्तीले डेनमार्कविरुद्धको खेलमा ह्याट्रिक समेत लिएका थिए । सिनियर अन्तर्राष्ट्रिय क्रिकेटमा नेपाली खेलाडीको यो पहिलो सफलता थियो ।
सोही वर्ष भएको एसिसी ट्रफीमा उनले १५ विकेट लिए भने डिभिजन चारमा १० विकेट हात पारे । डिभिजन चारअन्तर्गत मलेसियाविरुद्ध भएको खेलमा उनले विश्व कीर्तिमानी प्रदर्शन गरेका थिए ।
उनले १० ओभरमा ८ मेडन राखेर दुई रन दिँदै तीन विकेट लिएका थिए । एकदिशवशीय स्वरुपका सिनियर अन्तर्राष्ट्रिय प्रतियोगितामा शक्तीको यो बलिङ इकोनोमी अहिलेसम्म कसैले तोड्न सकेको छैनन् ।
सन् २००१ मा यू-१७ राष्ट्रिय टोलीमा समावेश हुँदै अन्तर्राष्ट्रिय प्रतियोगिता खेल्न थालेका शक्तीसँग यू-१९ स्तरको विश्वकप समेत खेलेको अनुभव छ । उनी अन्तर्राष्ट्रिय क्रिकेटमा १० पटक प्लेयर अफ दी म्याच घोषित भएका छन् ।
सिनियर अन्तर्राष्ट्रिय किकेटमा शतक प्रहार गर्ने थोरै नेपाली खेलाडीको सुचिमा शक्तीको पनि नाम छ । क्रिकेटप्रति उनको समर्पणलाई लिएर सर्वत्र प्रशंसा हुने गरेको छ । शक्तीले खेलाडी जिवनपछि पनि क्रिकेटमै सक्रिय हुने बताएका छन् ।
प्रकाशित: Dec 31, 2017| 18:23 आइतबार, पुस १६, २०७४