काठमाडौं- शारिरीक सुगठनको माउ संस्था नेपाल व्यायाम मन्दिरको अध्यक्षमा नारायण प्रधान पाँचौं कार्यकालका लागि अध्यक्षमा निर्विरोध निर्वाचित भएका छन् ।
२०१० सालमा स्थापित नेपाल व्यायाम मन्दिरको १८ औं साधारण सभा तथा निर्वाचनबाट अध्यक्ष प्रधान पाँच बर्षीय कार्यकालका लागि निर्विरोध निर्वाचित भएका हुन् ।
संस्थाको हालको विधान अनुसार दुई कार्यकालका लागि मात्र अध्यक्ष हुन पाउने प्रावधान रहेको छ । तर प्रधान विधान संसोधन हुनु अघि पनि तीन कार्यकाल व्यायाम मन्दिरको अध्यक्ष भई सकेका छन् ।
यस्तै अजय बज्राचार्य व्यायाम मन्दिरको प्रथम उपाध्यक्षमा निर्विरोध चयन भएका छन् । उनी यस अघिको कार्यसमितिमा महासचिव रहेका थिए । यस्तै रत्नलाल मानन्धर पनि द्वितीय उपाध्यक्षमा निर्विरोध निर्वाचित भएका छन् । व्यायाम मन्दिरको विधानमा दुई उपाध्यक्षको प्रावधान रहेकोमा संस्थालाई अझ चुस्त दुरुस्त राख्नका लागि विधान संसोधन गरि थप तीन उपाध्यक्ष नियुक्त गरिने अध्यक्ष प्रधनले जानकारी गराए ।
विधान संसोधन पश्चात दिनेश राजभण्डारी, नानीकाजी डङ्गोल र रविन्द्र कपालीलाई उपाध्यक्षमा चयन गरिने अध्यक्ष प्रधानले बताए । व्यायाम मन्दिरको महासचिवमा सूर्य प्रसाद जोशी ५२ मतका साथ निर्वाचित भए ।
उनका प्रतिद्वन्दि प्रतापकाजी बरियाले २७ मत प्राप्त गरे । यस्तै प्रशान्त सिंह आफ्ना प्रतिद्वन्दि ईश्वर श्रेष्ठ भन्दा ९ मत बढि प्राप्त गर्दै ४३ मतकासाथ कोषाध्यक्षमा निर्वाचित भए । ईश्वरले ३४ मत प्राप्त गरे । निर्वाचनमा कुल ८० मत खसेको थियो । जसमा एक मत बदर भएको थियो ।
यसैगरि व्यायाम मन्दिरको ६ सदस्यीय पदका लागि ८ जनाको उम्मेदवारी परेकोमा दिनेश श्रेष्ठ सर्वाधिक ७१ मत प्राप्त गर्दै सदस्यमा निर्वाचित भएका छन् । यस्तै अनिललाल श्रेष्ठ र रेण बहादुर बासुकलाले समान ६५ मत, रोशन महर्जन र निशान्त अमात्यले समान ५७ मत तथा ईश्वर खड्गीले ५४ मत प्राप्त गर्दै सदस्यमा निर्वाचित भए ।
अर्का उम्मेदवार संजीव श्रेष्ठले ४५ र राजन कुमार श्रेष्ठले ४३ मत प्राप्त गरे । निर्वाचित कार्यसमितिका सदस्यहरुलाई निर्वाचन आयुक्त घनश्याम मुखियाले प्रमाण पत्र प्रदान गर्नुका साथै पद तथा गोपनियताको सपथ गराएका थिए ।
प्रकाशित: Dec 31, 2017| 18:23 आइतबार, पुस १६, २०७४