काठमाडौं- नेपाली राष्ट्रिय टोलीका लेग स्पिनर सन्दीप लामिछाने आइतबार राति अष्ट्रेलिया जाने भएका छन् । उनी अष्ट्रेलियाको उच्च डिभिजनको क्रिकेट लिग बिग बास खेल्न आइतबार राति अष्ट्रेलिया जान लागेका हुन् ।
सन्दीप अष्ट्रेलियाको मेलबर्न स्टार्समा यसै सिजन अनुबन्धित भएका हुन् । बिग बास लिग डिसेम्बर १९ बाट सुरु हुनेछ । तर, सन्दीप टिमसँगको अभ्यासका लागि एक साता अगावै अष्ट्रेलिया जान लागेका हुन् ।
राजधानीमा जारी टिभिएस एभरेष्ट प्रिमियर लिग (ईपीएल) टी-२० क्रिकेटको टिम ललितपुरमा रहेका उनले इपीएलका दुई खेलमात्र खेल्दै अष्ट्रेलिया जान लागेका हुन् ।
सन्दीपले आफु टिममा पर्ने लक्ष्यसहित अष्ट्रेलिया जान लागेको बताए । ‘एक टिममा मात्र २ विदेशी खेलाडीले खेल्न पाउने छ । त्यसैले निकै गार्हो छ,’ सन्दीपले भने, ‘अभ्यास र खेलमा राम्रो प्रदर्शन गर्नु पर्छ । पाएको मौकालाई सदुपयोग गर्नेछु । टिममा पर्ने मौका छ ।’
बिग बास लिगकै दौरान सन्दीप बंगलादेश प्रिमियर लिग खेल्न बंगलादेश जानेछन् । सन्दीपले बिग बासको पाँच देखि ६ खेलपछि बंगलादेश जानेछन् । बंगलादेश प्रिमियर लिग जनवरी ५ देखी फेब्रुवरी ८ सम्म हुनेछ ।
बंगलादेशमा सन्दीपले सिल्हेट सिक्सरबाट खेल्नेछन् । यस सिजन निकै व्यस्त रहेका सन्दीपले हालै युएईमा टी-१० लिग खेलेका थिए ।
प्रकाशित: Dec 31, 2017| 18:23 आइतबार, पुस १६, २०७४