सुत्केरी भत्ता दिन पैसा छैन, उधारो राख्दै छन् सरकारी कार्यालय

नेपाल समयले आइतबार बिहानसम्म भएका घटना तथा सूचनाहरको संगालो बिहानी बुलेटिन सार्वजनिक गर्ने गरेको छ। जसमा रातिभरी भएका गतिविधि र आइतबार प्रकाशित पत्रपत्रिकाका सामाग्रीहरु समावेश गरिएका छन्।

सर्केगाड गाउँपालिका १ जैरको मन्दिरा बुढा गर्भवती भएपछि नियमित स्वास्थ्य संस्थामा पुगेर परीक्षण गराइन् । उनले बर्थिङ सेन्टरमा बच्चा जन्माइन । घर फर्किने बेला स्वास्थ्यकर्मीले भने, ‘अहिले पैसा छैन, उधारो भयो । पछि लग्नुहोला ।’ जेठमा बच्च जन्माएकी मन्दिरा मंसिरसम्म पटकपटक बर्थिङ सेन्टरमा पुगिन्, सुत्केरी भत्ता  लिन । ‘अहिलेसम्म दिएका छैनन् । उधारो नै छ । जहिल्यै पछि आउनुहोला भन्छन्,’ उनले भनेको नयाँ पत्रिकामा खबर छ । 

ट्याक्सी चालकले नियम मिचे लाइसेन्स निलम्बनको कारबाही हुने भएको छ । चालकले तोकिएभन्दा बढी भाडा लिए, यात्रुलाई भनेको ठाउँमा नपुर्‍याए, मिटरमा जान नमाने, भाडामा मोलमोलाइ गरे, ट्याक्सीको मिटर विगारे, प्रयोजनविपरीत ट्याक्सी चलाए र विग्रिएको मिटर बेलैमा मर्मत नगरे चालकलाई कारबाही हुने पनि नयाँ पत्रिकामा खबर छ । 

सरकारले भैसेपार्टीमा मन्त्री क्वाटर बनाउने निर्णय गरेको छ । तर, यो निर्णय संसद्लाई नै थाहा छैन । संघीय संसदका सभामुख कृष्णबहादुर महराले यस विषयमा आफूसँग कुनै सल्लाह नभएको र एक्कासी निर्णय भएको सुनेको बताए । यो निर्णयप्रति सांसदले पनि आपत्ति जनाएको महराले बताए । सरकारले मन्त्री क्वार्टर बनाउने भनेको जग्गा संसद सचिवालयको नाममा रहेको खबर कान्तिपुरमा छ । त्यस्तै डोटीमा भने अहेवको ठाउँमा डाक्टरले सेवा दिइरहेको खबर छ । 

नागरिक दैनिकले धनुषमा छोरी सरकारीमा छोरा बोडिङमा पढाउने गरेको, विराटनगर, इहटरी, धरानलगायतका प्रदेश एकका मुख्य सडकमा चक्रपथ बनाउने योजना अलपत्र परेको, नेपाली भूमिमा अपराध गरेर भारत गई लुक्ने प्रवृत्तिले आरोपित÷अभियुक्तलाई तत्काल पक्राउ गर्न कठिन भएको खबरलाई प्राथमिकताका साथ छापेको छ ।