काठमाडौं- इंग्ल्यान्डको लर्डस क्रिकेट रंगशालामा जारी टेस्ट खेलमा इन्डियाले घरेलु टिमलाई दोस्रो दिनको खेल सकिँदासम्म २४५ रनले पछि पारेको छ।
लर्डसमा जारी खेलमा इन्डिया १२६.१ ओभरमा ३६४ रन बनाएर अलआउट भएपछि इंग्ल्यान्डले ब्याटिङ सुरु गरेको थियो। दोस्रो दिनको खेल सकिँदा इंग्ल्यान्डले तीन विकेटको क्षतिमा ११९ रन बनाएको छ।
इंग्ल्यान्डका लागि रोरी बर्नसले ४९ रन बनाए भने कप्तान जो रुटले ४८ रन बनाएका छन्। रुट अझैसम्म मैदानमै छन्। उनलाई जोन्नी बेयरिस्टवले साथ दिइरहेका छन्। यता इन्डियाका मोहम्मद सिरजले दुई र मोहम्मद शामीले एक विकेट लिएका छन्।
त्यसअघि ब्याटिङमा आएको इन्डियाले ३६४ रन बनाएको थियो। जहाँ केएल राहुलले १२९ रनको सानदार पारी खेलेका थिए। उनले जारी दोस्रो टेस्टमा २५० बलमा १२ चौका र एक छक्कासहित १२९ रन बनाएका हुन्।
उनीसँगै मैदान छिरेका रोहित शर्माले पनि सानदार प्रदर्शन गरेका छन्। उनले १ सय ४५ बलमा ८३ रन बनाए।
यी दुई खेलाडीले १२६ रनको साझेदारी गरेका थिए। त्यस्तै, १०३ बलसम्म मैदानमा टिकेका इन्डियन टिमका कप्तान विराट कोहलीले भने ४१ रन बनाएका छन्।
त्यस्तै, ऋषभ पन्त ३७ र रविन्द्र जाडेजाले ४० रन बनाएका थिए। यता अजिंक्य रहाणे भने एक रन बनाउँदै आउट भए।
इंग्ल्यान्डका जेम्स एन्डरसनले पाँच विकेट लिए भने ओली रोबिन्सन र मार्क वुडले समान दई/दुई विकेट लिएका छन्। मोइन अलीले एक विकेट गिराए।