काठमाडौं– जर्मन बुन्डेसलिगाअन्तर्गत लिगको पहिलो खेलमा साविक विजेता बायर्न म्युनिख हारबाट जोगिएको छ।
बोरुसिया मोन्छेनग्लाडबाखको मैदान बोरुसिया पार्कमा शुक्रबार राति भएको खेलमा घरेलु टिमसँग १–१ गोलको बराबरी खेल्दै बायर्न हारबाट जोगिएको हो।
खेलको नवौं मिनेमै ग्लाडबाखका एलासानले प्लिले गोल गरेपछि बायर्न एक गोलले पछि परेको थियो। तर, पहिलो हाफकै ४२औं मिनेटमा रोबर्ट लेवान्डोस्कीले र्कीर्तिमानी गोल गरेर बायर्नलाई हारबाट माथि ल्याए।
जोसुवा किमिचले प्रहार गरेको कर्नर बलमा उनले गोलको खाता खोलेका हुन्। लेवान्डोस्कीले बुन्डेसलिगाको लगातार सात सिजनमा ओपनिङ गोल गरेका छन्।
साथै उनले बुन्डेसलिगाका लगातार ११ खेलमा गोल गर्दै यस दौरान १८ गोल पुर्याएका छन्। यता नवौं सिजन लगातार उपाधि जितको बायर्नले खेलमा पहिलो अग्रता बनाउन भने चुकेको थियो।
अधिक समय बलमा नियन्त्रण बनाएको बायर्नले ग्लाडबाखको पोस्तर्फ २१ प्रहार गरे पनि एकबाहेक सबै प्रयास खेर गएका थिए। यता ग्लाडबाखले पनि नवौँ मिनेटको प्रहार बाहेक अन्य प्रहारलाई गोलमा बादल्न सकेन्। लेवान्डोस्की र स्टिन्डी दोस्रो हाफमा विजयी गोल नजिक पुगे पनि गोल गर्न सकेनन्।
यो बराबरीसँगै लिगको पहिलो खेलमा बायर्न र ग्लाडबाखले समान १–१ अंक बाँडेका छन्। पछिल्लो सिजन बायर्नलाई लिगको उपाधि दिलाएका हान्सि फ्लिकले अहिले क्लब छोडिसकेका छन्।
उनको स्थानमा जुलियन नागेस्मेनले प्रशिक्षणको जिम्मेवारी पाएका छन्। बुन्डेलिगा क्लब आरबी लाइप्जिकका ३४ वर्षे पूर्व प्रशिक्षक नागेस्मेनलले लिगमा आफूलाई उत्कृष्ट सावित गर्दै नयाँ क्लब क्लब लाइप्जिकलाई पछिल्लो सिजनमा लिगको उपविजेता बनाएका थिए।