वीरगञ्‍जमा हरियो तरकारीको बजार सस्तियो

वीरगञ्‍ज-उत्पादनमा वृद्धि भएपछि यसवर्ष हिउँदमा हरियो तरकारीको बजार सस्तिएको छ। पर्याप्त उत्पादनसँगै स्थानीय बजारमा तरकारीको आपूर्ति पर्याप्त मात्रामा भएकाले तरकारीको भाउमा गिरावट आएको हो ।

तरकारी तथा फलफूल व्यवसायी सङ्घ पर्साका अध्यक्ष विदुर गुप्ताले पर्सा र छिमेकी जिल्ला बारामा हरियो तरकारीको उत्पादन अत्यधिक भएकाले यसपटक हिउँदमा उपभोक्तालाई हरियो तरकारीमा राहत मिलेको बताए । 

गतवर्ष दशैंदेखि छठ पर्वसम्मको अवधिमा काउली प्रतिकिलो एक सय ५० रुपैयाँसम्म बिक्री भएको थियो । अहिले प्रतिकिलो १५ देखि २५ रुपैयाँ सम्ममा बिक्री भइरहेको व्यापारीले बताए ।
फलफूल तथा तरकारी व्यवसायी संघका अनुसार   आलु, प्याज र हरियो तरकारी समेत दैनिक ६० टन तरकारीको माग हुन्छ।

बाराको सिम्रौनगढ र मकवानपुरको पालुङ बाट आलु आयात गरिएपनि ठूलो परिमाणमा आलु र  प्याज भारतबाटै पैठारी हुँदै आएको छ । हरियो तरकारी पर्सा, बारा र मकवानपुरबाट आपूर्ति हुन्छ। 

स्थानीय बजारमा प्रतिक्विन्टलमा नयाँ आलु  ३ हजार १ सय, पुरानो आलु २ हजार ८  सय, नयाँ प्याज ३ हजार १ सय, पुरानो प्याज २ हजार ७ सय रुपैयाँमा बिक्री भइरहेको छ। 

यसैगरी, थोक बजारमा हरियो केराउ ७०, काउली १५, बन्दा काउली १५, गोलभेंडा ४५, तोरीको साग १५, भन्टा २५, मुला ५, परवर ३५ रुपैयाँ प्रतिकिलोमा बिक्री भइरहेको छ। लौका प्रतिगोटा २५ रुपैयाँमा बिक्री भइरहेको अध्यक्ष गुप्ताले बताए।