सिन्धुपाल्चोक- सिन्धुपाल्चोकको चौतारा साँगाचोक गढी नगरपालिका–४ स्थित गौराँती भीमसेन मन्दिरमा धुमधामका साथ जात्रा मनाइएको छ । कात्तिक शुक्ल पूर्णिमादेखि तीन दिनसम्म मनाइने यो चौताराको सबैभन्दा ठूलो जात्रा हो ।
चौतारामा रहेका भीमसेन र गौराँती भीमसेन दाजुभाइ मानिन्छन् । यही कारणले जात्राको अन्तिम दिन आइनबार गौराँती मन्दिरमा चौतारादेखि रथ लाने गरिएको छ ।
तीन दिनसम्म मनाइने जात्राको अन्तिम दिन आइतबार गौराँती भीमसेनमा लगेका रथ टोलटोल तथा घरघरमा लगी पूजा गरिन्छ । जात्रामा सिन्धुपाल्चोकका विभिन्न गाउँ, दोलखा, काभ्रे र काठमाडौं उपत्यकाबाट समेत श्रद्धालु पुग्ने गर्छन् ।
जात्राको पहिलो दिन गौराँती भीमसेन मन्दिरमा महादीप बालेर जाग्राम बस्ने, दोस्रो दिन गौराँतीमा पूजाआजा गर्ने र तेस्रो दिन सिन्दूर जात्रा गरी जात्रा समापन गरिन्छ ।
पशुबलिका लागि पनि यो जात्रा निकै प्रख्यात छ । गौराँती गुठी संस्थाका सदस्य चन्द्र श्रेष्ठका अनुसार केही वर्षअघि मुख्य मन्दिरमा नदिई मन्दिर परिसरमा बलि दिँदा त्यहाँ चट्याङ, हावाहुरी र रोगव्याधले सताएको थियो ।
मन्दिरमै बलि नचढाउनाले यस्तो समस्या आएको तान्त्रिकको सल्लाहपछि मुख्य मन्दिरमै बलि दिन थालेको उनले जानकारी दिए ।
जात्रामा करिब ५० हजारदेखि एक लाख भक्तजनले भीमसेनको दर्शन गरेको जात्रा आयोजकले जनाएको छ ।
तस्बिरः यज्ञरत्न बज्रचार्य प्रकाशित: Dec 31, 2017| 18:23 आइतबार, पुस १६, २०७४