नेयमार र एमबाप्पे विनाको पिएसजी विजय

एजेन्सी- शनिबार राति भएको लिग वानमा साविकको विजेता पेरिस सेन्ट जर्मेन (पिएसजी) विजय भएको छ । पिएसजी टुलुसमाथि १-० ले विजय भएको हो । 

घरेलु मैदानमा नेयमार र केलियन एमबाप्पे बिना मैदान उत्रिएको पिएसजीका लागि एडिन्सन काभानीले निर्णायक गोल गरे । काभानीले खेलको ९ औं मिनेटमा गरेको गोल नै पिएसजीको जितमा निर्णायक बन्यो । 

यस जितसँगै पिएसजीको फ्रेन्च लिग वान फुटबलमा अपराजित यात्रा कायम राहेको छ । पिएसजीले लिग वानमा १४ औं खेलसम्म अपराजित यात्रा कायम राखेको छ । टुलुसविरुद्ध घाइते भएका कारण नेयमार र एमबाप्पे मैदान उत्रिएनन् । 

अन्तर्राष्ट्रिय मैत्रीपूर्ण खेल अन्तर्गत क्यामरुनसँगको खेलमा नेयमार घाइते भएका कारण मैदान उत्रिएनन् । त्यस्तै एमबाप्पे पनि उरुग्वेविरुद्धको खेलका दौरान घाइते भएका थिए । यो जितसँगै पिएसजीले १४ खेलबाट ४२ अंक जोडेको छ ।

र, दोस्रो स्थानको लियोन भन्दा १५ अंकले अघि रहेको छ । पराजित टुलुस १४ अंक जोडेर १५ औं स्थानमा रहेका छन् ।