काठमाडौं- पल्सर सहिद स्मारक ‘ए’ डिभिजन लिग अन्तर्गत बिहीबारको पहिलो खेलमा च्यासल युवा क्लबले लिगमा आफ्नो पहिलो जित निकबालेको छ । न्यू रोड टिम (एनआरटी) लाई ५-१ गेलले पराजित गर्दै लिगमा पहिलो जित निकालेको हो ।
च्यासलको जितमा स्टाइकर विमल घर्तिमगर र अमिर श्रेष्ठले २-२ गोल गर्दा सन्तोष साहुखलले १ गोल गरे । च्यासलका लागि अमिर श्रेष्ठ खेलको १४ औं मिनेटमा पहिलो गोल गर्दै टोलीलाई सुरुवाती अग्रता दिलाएका थिए ।
उनले २९ औं मिनेटमा आकर्षक भलीमार्फत पुनः च्यासलको अग्रता दोब्बर पारे । एनआरटीका लागि आठौं मिनेटमा राजेश परियारले गरेको फितलो प्रहार गोलरक्षक दिनेश थापामगरले सहजै बचाए ।
२० औं मिनेटमा एनआरटीकै डिकेश खड्गीले सुशील लामाको पासलाई सदुपयोग गर्न सकेनन् । च्यासलका सन्तोष साहुखलले ३२ औं मिनेटमा पेनाल्टी क्षेत्रभित्र गरेको प्रहारलाई गोलरक्षक सोजित गुरुङले विफल पारिदिए ।
पहिलो हाफमा २-० ले अगाडी रहेको च्यासलले दोस्रो हाफमा ३ गोल थप्यो । ५७ औं मिनेटमा विमल घर्तिमगरले गोल गरे । हेमन्त थापामगरको क्रसमा सन्जोग राईले ६ यार्ड बक्सभित्रबाट दिएको हेडर पासमा विमलले गोल गरे ।
त्यसपछि सन्तोष साहुखलले ६४ औं मिनेटमा विमलको पासमा गोल गरे । ८६ औं मिनेटमा हेमन्त थापामगरको क्रसमा सन्तोष साहुखलले सट प्रहार गर्न नसक्दा फार पोस्ट मा अन्मर्क रहेका विमलको शक्तिशाली प्रहार गोलरक्षक सोजित गुरुङले बचाउन सकेनन् ।
एनआरटीका लागि इन्ज्युरी समयको पहिलो मिनेटमा मसुदले सान्त्वना गोल फर्काए । च्यासलको जारी लिगमा यो पहिलो जित हो । टोलीको ३ खेलमा ४ अंक भएको छ । एनआरटी भने लगातार दोस्रो खेलमा पराजित भयो । एनआरटीको ३ खेलमा १ अंक छ ।
प्रकाशित: Dec 31, 2017| 18:23 आइतबार, पुस १६, २०७४