विराटनगर विमानस्थलमा माउन्टेन फ्लाइटको ट्रायल

विराटनगर- नेपालको क्षेत्रीय विमानस्थल र प्रदेश १ को मुख्य विमानस्थल विराटनगर विमानस्थलबाट माउन्टेन फ्लाइटको ट्रायल हुने भएको छ ।  विराटनगर विमानस्थलका प्रमुख टेकनाथ सिटौलाले आगामी शनिबार माउन्टेन फ्लाइटको तयारी भएको बताए । 

एयरलाइन्स र पर्यटन व्यवसायीको पहलमा माउन्टेन फ्लाइटको ट्रायल गर्न लागिएको सिटौलाले बताए । प्रदेश १  सरकारले नीति तथा कार्यक्रममा माउन्टेन फ्लाइट गर्ने भने पनि अहिले कुनै सहयोग नगरेको व्यवसायीको भनाइ छ । ट्रायल सफल भएमा हरेक शनिबार तीनवटासम्म माउन्टेन फ्लाइट गर्ने तयारी छ । 

माउन्टेन फ्लाइटका क्रममा प्रदेश १ मारहेका सर्वोच्च शिखर सगरमाथा, ल्होत्से, कञ्चनजंघा र मकालु आदि हिमशिखरहरु सहजै अवलोकन गर्न सकिने छ । 

व्यवसायीका अनुसार व्यावसायिक रूपमा प्रदेश १ मा यो नै प्रथम नियमित माउन्टेन फ्लाइट हो । यसअघि २०७३ फागुन ११ देखि १७ गतेसम्म भएको विराट एक्सपो पनि माउन्टेन फ्लाइटको एउटा उडान भएको थियो । 

‘विराट होलिडेज’ ट्राभल एजेन्सीमा आबद्ध पर्यटन  व्यवसायीले जहाज चार्टड गरेर माउन्टेन फ्लाइटको परीक्षण गर्ने कार्यक्रम छ । प्रदेश १ उद्योग वाणिज्य  महासंघका पर्यटन तथा हवाई यातायात समितिका संयोजक भविष श्रेष्ठको टिमले यसको अगुवाइ गरिरहेको छ । 

शनिबार बिहान ७ बजे पहिलो परीक्षण उडान हुनेछ । धरानका पर्यटन व्यवसायी तथा सेछ ट्राभलिङका सञ्चालक बासुदेव बरालका अनुसार यती एयरलाइन्सको जेटस्ट्रिम जहाजबाट माउन्टेन फ्लाइटको परीक्षण गर्ने तयारी भएको एयरलाइन्सका विराटनगर शाखा प्रमुख प्रेम कुँवरले बताए । २९ सिटे यो जहाजका झ्यालका १९ सिटमा १९ यात्रुले सहजै हिमाल देख्न सक्ने कुँवरले बताए । माउन्टेन फ्लाइट ५५ मिनेटको हुनेछ भने शुल्क  ९ हजार ९ सय तोकिएको छ ।  

३० मिटर चौडाइसहित १५ सय मिटरको धावनमार्ग र १ सय २० बिघा क्षेत्रफलमा फैलिएको विराटनगर विमानस्थलमा कुनै पनि जहाज पार्किङ हुँदैनन् । केही महिनाअघिसम्म बेलाबेला बुद्ध एयरले जहाज पार्किङ गरे पनि हाल कुनै जहाज विराटनगर विमानस्थलमा पार्किङ हुँदैनन् । 

माउन्टेन फ्लाइटको सञ्चालन भएपछि बेलुका पनि विमानस्थलमा जहाज पार्किङ हुने भएको छ । शुक्रबार राति आएको जहाज बिहान माउन्टेन फ्लाइट गरेर आफ्ना नियमित यात्रु लिएर काठमाडांै जाने यती एयरलाइन्सका विराटनगर प्रमुख प्रेम कुँवरले बताए ।

विमानस्थल सञ्चालक सिटौलाले विराटनगर विमानस्थल माउन्टेन फ्लाइटका लागि उचित भएको बताए । पञ्चायत कालमा विराटनगर विमानस्थलबाट भारतको पटनासम्म कस्मिक एयरबाट उडान भएको जानकारी सिटौलाले दिए । उनले भने, ‘पूर्वाधारको हिसाबमा विराटनगर विमानस्थलबाट माउन्टेन फ्लाइट सहजै हुन्छ । अब कत्तिको व्यावसायिक रूपमा चल्छ त्यो भने पहिलो ट्रायलबाट थाहा हुन्छ ।’