धादिङ- धादिङको ज्वालामुखी गाउँपालिका–५ बुङकोटघाटमा गोरखा र धादिङका दुई समूहबीच झडप हुँदा प्रहरीसहित एक दर्जन युवा घाइते भएका छन् ।
आइतबार राति एकादशी मेला भर्ना गएका दुई जिल्लाका युवाबीच ढुङगा र भाटा हानाहान भएपछि झगडा छुट्टाउन गएका प्रहरी समेत घाइते भएको हो ।
झडपमा परि धादिङका असई विनयकुमार पाण्डे गम्भिर घाइते भएको धादिङका प्रहरी नायव उपरीक्षक श्यामकुमार महत्तोले जानकारी दिए। पण्डेको टाउकोमा गम्भीर चोट लागेको र उनलाई उपचारका लागि काठमाडौं पठाइएको महात्तोले बताए । धादिङ र गोरखाबाट १० जनाको संख्यामा प्रहरी मेलाको सुरक्षाको लागि खटिइएको धादिङ प्रहरीले जानकारी दिएको छ।
यस्तै झडपमा दुई पक्षका करिव एक दर्जन यूवा घाइते भएका छन् । सामान्य घाइते उनीहरु भागेका छन् । झडपमा ४ वटा बोलेरो र ६ वटा मोटरसाइकलमाथी तोडफोड भएको छ। गोरखातर्फको २ वटा बोलेरो र ४ वटा मोटरसाइकल र धादिङतर्फको २ वटा बोलेरो र २ वटा मोटरसाइकलमा तोडफोड भएको प्रहरीले जनाएको छ ।
प्रकाशित: Dec 31, 2017| 18:23 आइतबार, पुस १६, २०७४