काठमाडौं- नेपाली सेनाको त्रिभुवन आर्मी क्लबका रत्नजित तामाङ्ग पुष्पलाल स्मृती ब्याडमिन्टन प्रतियोगिताको लगातार सातौ पटक च्याम्पियन भएका छन् । शनिबार सम्पन्न योनेक्स सनराईज आठौं पुष्पलाल स्मृती राष्ट्रिय खुल्ला ब्याडमिन्टन प्रतियोगितामा एपिएफका दिपेश धामीलाई २१-११, २१-१६ को सहज जितसँगै रत्नले सातौं पटकको विजयी ईतिहास रच्न सफल भएका हुन् ।
तामाङ्गले नगद ५० हजार हात पारे । उपविजयी दिपेशले नगद २० हजार, तेश्रो स्थान हात पार्ने सेनाका नविन श्रेष्ठ र रुकेश महर्जनले नगद १०-१० हजारका साथ ट्रफि मेडल र प्रमाण पत्र हात पारे ।
त्रिपुरेश्वरस्थित कभर्डहलमा भएको प्रतियोगिताको महिला एकल तर्फको खेलम सेनाकी नङ्गशल देवी तामाङ्गले सेनाकै रशिला महर्जनमाथि जित निकाल्दै पुनरागमन गरेकी छिन् । अघिल्लो संस्करणमा जेशिका गुरुङ्गसँग पराजित भएकी नङ्गशलले महर्जनलाई २२-२०, १५-२१ र २१।१८ ले पाखा लगाईन् ।
तामाङ्गले ५० हजार र उपविजेता महर्जनले २५ हजार सहित ट्रफी मेडल र प्रमाण पत्र प्राप्त गरे । एपिएफका शोभा गौचन र जेशिका गुरुङ्गले तेश्रो स्थान हात पार्दै नगद १०।१० हजार सहित ट्रफी, मेडल र प्रमाण पत्र प्राप्त गरे ।
नेपाल खेलकुद महासंघ अन्तरगत राष्ट्रिय ब्याडमिन्टन संघको आयोजनामा भएको पुरुष युगल तर्फ सेनाका रत्नजित तामाङ्ग र नविन श्रेष्ठको जोडी विजयी भयो । रत्न र नविनको जोडीले एपिएफका दिपेश धामी र बिजित थापा मगरको जोडीमाथि २२।२०, २०।२२ र २१-११ को कठिन जित निकाल्दै उपाधी जिते ।
तेश्रो स्थानमा सेनाका रुकेश महर्जन र प्रफुल महर्जन तथा एपिएफका गौतम कठायत र सुनिल जोशीको जोडी रहे । शिर्ष तीन स्थान प्राप्त गर्ने जोडीले नगद २०, १० र ५ हजारका साथै ट्रफी, मेडल र प्रमाण पत्र प्राप्त गरे ।
महिला युगल तर्फ एपिएफका पुजा श्रेष्ठ र जेशिका गुरुङ्गको जोडीले उपाधी हात पार्यो । विजयी जोडीले नगद २० हजार सहित मेडल, प्रमाण पत्र र ट्रफी प्राप्त गरे । यु-१७ ब्वाईज तर्फ दुवई जुनियर अन्तराष्ट्रिय सेरिजमा स्वर्ण पदकधारी सिल्क ग्रुपका प्रिन्स दाहालले सेनाका दिवस शंकरलाई पराजित गरे । दाहालले नगद १५ हजार दोश्रो स्थानका दिवसले ७ हजार, तेश्रो स्थानमा रहेका जेष्टका प्रियान्सु सिंह क्षेत्री र पेम्बा शेर्पाले नगद ५-५ हजार प्राप्त गरे ।
प्रकाशित: Dec 31, 2017| 18:23 आइतबार, पुस १६, २०७४