काठमाडौं– विभिन्न पेसागत माग राखेर प्रधानमन्त्री निवास बालुवाटार घेराउ गर्न पुगेका शिक्षकहरू गिरफ्तार भएका छन्। बिहान धर्ना दिनुअघि टंगालस्थित टंगाल माविमा भेला भएका शिक्षकहरूलाई प्रहरीले धर्नास्थलमा जान नदिई गिरफ्तार गरेको नेपाल शिक्षक संघ काठमाडौं महानगरका अध्यक्ष नारायण गौतमले जानकारी दिए।
गिरफ्तार गरिएका शिक्षक नेताहरूमा महासंघका सहअध्यक्ष पूर्ण दवाडी, महासचिव लक्ष्मीकिशोर सुवेदी, शिक्षक संघका राष्ट्रिय अध्यक्ष राजेन्द्रराज पौडेल, महासचिव सोमनाथ गिरी, वरिष्ठ उपाध्यक्ष यमपी भुसाल, संघका केन्द्रीय उपमहासचिव सुन्दर पन्त, एकीकृत नेपाल शिक्षक संगठनका अध्यक्ष शंकर अधिकारी, विद्यालय कर्मचारी परिषद्का महासचिव प्रदीप श्रेष्ठलगायत छन्। उनीहरुलाई हाँडीगाउँस्थित ट्राफिक प्रहरी वृत्तमा राखिएको छ।
नेपाल शिक्षक महासंघले ३४ बुँदे मागमा सरकारले चासो नदेखाएपछि धर्ना दिन लागेको थियो। धर्नाको तयारीमा रहेका शिक्षकहरूलाई विद्यालयबाटै पक्राउ गरिएको भन्दै शिक्षकसँग सम्बन्धित पेसागत संगठनहरूले आपत्ति जनाएका छन्।
प्रारम्भिक बालविकास सहजकर्ता र विद्यालय कर्मचारीको तलब वृद्धि, गुणस्तरीय शिक्षाको लागि राज्यले कुल बजेटको २० प्रतिशत लगानी गर्नुपर्ने, संघीय शिक्षा ऐन जारी गर्नुपर्ने, संवैधानिक प्रबन्धमा परिवर्तन गर्नुपर्ने लगायतका माग राख्दै महासंघ गत वैशाख २० गतेदेखि महासंघ आन्दोलनरत छ।
महासंघले यसअघि प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, अर्थमन्त्री जनार्दन शर्मालाई भेटेर आफ्ना मागका विषयमा ध्यानाकर्षण गराइसकेको छ।