बुद्धजन्मस्थल लुम्बिनीमा पहिलोपटक त्रिपिटकको सामूहिक पाठ सुरु भएको छ । त्रिपिटक पाठमा नेपाल, भारत, श्रीलंका, म्यानमार, क्याम्बोडिया, थाइल्याण्ड, चीन, कोरिया, जापानलगायतका देशबाट बौद्ध भिक्षु, लामा, भिक्षुणीगरी तीन सय र गृहस्थ उपासक उपासिकाहरू गरी करिब ५ सय जनाले सामूहिक रूपमा पाठ सुरु गरेका छन् ।
बुधबारदेखि सुरु भएको पाठ शुक्रबारसम्म चल्ने अखिल नेपाल भिक्षु महासंघका अध्यक्ष भिक्षु मैत्री महास्थविरले बताए। सामूहिक त्रिपिटक पाठ लुम्बिनीस्थित मायादेवी मन्दिरको उत्तर पुर्वको पवित्र उद्यानमा भईरहेको छ ।
कार्यक्रम अनुसार दोस्रो दिन विहीबार ८ बजेदेखि ११ बजेसम्म पाठ हुनेछ । यस सत्रको नेतृत्व महायानी सम्प्रदायका गुरुहरुले गर्नेछन् । त्यसपछि चीनियाँ तथा जापानी भिक्षुहरूको नेतृत्वको सत्र चल्ने छ ।
तेस्रो दिनमा थाइ भन्तेहरूको नेतृत्वमा पाठ हुनेछ । दिउँसो १ बजे पछिको सत्रमा नेपाली र आनीहरूले पाठको नेतृत्व लिनेछन् । तेस्रो दिनको पाठ सकिएपछि त्यहाँ पाठ कार्यक्रममा सहभागी सबैकोतर्फबाट मायादेवी मन्दिरको वरिपरी मैनबत्तीसहितको शान्ति पदयात्रा तथा द्वीप प्रज्वलन कार्यक्रम गरिने आयोजकले जनाएका छन् । यसका साथै दुई दिन नेपालकै प्रतिष्ठित बौद्ध विद्वानहरूबाट धर्म देशना पनि हुने कार्यक्रम छ । पहिलो दिनको धर्मदेशना उपसंघनायक भिक्षु ज्ञानपूर्णिकबाट र दोस्रो दिनका लागि चोकी निमा रिम्पोछे गर्नेछन् ।
लुम्बिनीमा हुने त्रिपिटक पाठमा बुद्धले शुद्धोदन महाराजलाई देशना गरेको बिसन्तर जातक तथा शाक्य र कोलीयहरूको युद्ध हुनलाग्दा कपिलवस्तुमै देशना गरेको महासमय सुत्र पाठ गरिने आयोजक अखिल नेपाल भिक्षु महासंघका अध्यक्ष भिक्षु मैत्रेयले बताए ।
कार्यक्रमका लागि करिब १० लाख खर्च हुने अनुमान गरिएको छ । यसमा प्रदेश सरकार लुम्बिनी विकास कोष र स्थानीय नगरपालिका तथा होटल व्यवसायी संघसंस्थाबाट पनि सहयोग हुने जनाइएको छ । आयोकजले कार्यक्रम सफल पार्न अखिल नेपाल भिक्षु महासंघका अध्यक्ष तथा लुम्बिनी विकास कोषका आध्यात्मिक सल्लाहकार भिक्षु मैत्री महास्थबीरको संयोजकत्वमा १५ सदस्यीय समिति गठन समेत गरेको छ । जसको धार्मिक सल्लाहकार सदस्यहरुमा भिक्षु आश्वघोष महाथेरा, भिक्षु गण पुर्निका महाथेरा, भिक्षु फ्रा धामबोधीबोंग , भिक्षु छोकी निमा रिम्बोचे रहेका छन् ।
विभिन्न देशका ५ सय जनाले पाठ गर्ने उक्त त्रिपीटिक पाठ सुन्न ३ दिनमा स्वदेशी तथा विदेशी गरी करिब १० हजार बौद्ध धर्मालम्बी श्रोता सहभागी रहने व्यवस्थापन समन्वय समिती सचिव पन्तले जानकारी दिए ।