इटहरी- दक्षिण भोजपुरको हतुवागढी गाउँपालिकाकी तारा परियार गाउँमा सडक आउँदा अत्यन्तै खुसी थिइन् । सडकसँगै सहरी पूर्वाधार बन्ला, धारामा नियमित पानी र बिजुली बत्ती बलान् पाइने आशा थियो परियारको । सडक बनेपछि गाउँ गाडी भित्रियो, मधेस र सहरमा मात्रै कुद्ने अटो आयो । धुले सडकमा ती सवारीसाधन गुड्न थालेपछि गाउँमा सबैभन्दा धेरै धुलो उड्न ल्यायो । वातावरण प्रदूषित भयो । तर, धारामा पानी र बिजुली बत्ती भने आएन ।
गाउँपालिकाको वडा नम्बर ८ की दलित महिला सदस्य परियारले धारामा नियमित पानी नआउँदा खान र कपडा धुन समस्या भएको बताइन् । उनले भनिन्, ‘बत्ती आउने कुरा धेरै भयो । काम हुन सकेको छैन ।’
जनप्रतिनिधि परियारको मात्रै हैन वडा नम्बर ४ की गृहिणी कालीमाया कार्कीका गुनासो उस्तै छ । उनको घरमा धारा छ । तर, पानी नियमित आउँदैन । पात्लेपानी धाराबाट गाग्रीमा पानी भरी डोकोमा बोक्नुपर्ने बाध्यता छ कार्कीको । कार्कीले दुःखेसो गरिन्, ‘पात्लेपानी भनेर के गर्नु ? पानी नियमित आउँदैन । ऐरेनीको मुहानबाट पानी आउनासाथ बन्द हुन्छ ।’
खैराङ बजारका छाया खत्रीले पसलमा सोलार जोडेको २१ वर्ष भयो । पटकपटक मर्मत र ब्याट्री फेर्दा आधा लाख सकिएको खत्रीले बताइन् । उनले भनिन्, ‘बिजुलीको पोल आयो तर बत्ती बल्ने कहिले हो कुनै टुंगो छैन ।’
खैराङकै सीता कुँवर खानेपानी महसुलबापत मासिक ६० रुपैयाँ तिर्छन् । धारामा पानी भने आउँदैन । स्थानीय पीपलडाँडाको सार्वजनिक धारामा पानी भर्दै गरेकी कुँवरले गाँउलेहरू पानी अभावले समस्यामा परेको बताइन् । उनले भनिन्, ‘बिहान साढे दुइ घन्टा पानी आउँथ्यो । सडकमा कुद्ने डोजर र गाडीले पाइप फुटाइदिँदा पानी बन्द हुन्छ ।’ जोगीटारको मुहानमा पैसा तिरे पनि नियमित रूपमा पानी प्रयोग गर्न नपाएको बताइन् ।
विद्यालय उमेरका बालबालिकाको बिहान पानी जम्मा गर्दै बित्ने कुँवर बताउँछिन् । उनी भन्छिन्, ‘पानी जम्मा गर्नुपर्दा बिहान घरका धेरै काम गर्नै पाइँदैन ।’ प्रदेश १ का मुख्यमन्त्री शेरधन राईले यसै क्षेत्रबाट चुनाव जितेका हुन् भने राष्ट्रपति विद्यादेवी भण्डारीको जिल्ला पनि यही हो ।
गाउँपालिका अध्यक्षकै वडा अँध्यारोहतुवागढी गाउँपालिका वडा नम्बर ४ र ८ जस्ता बिजुली नपुगेका क्षेत्रमा मात्रै होइन, बिजुली पुगेका ठाउँका बासिन्दासमेत अँध्यारोमै बस्न विवश छन् । हतुवागढी गाउँपालिकाको मुख्य कार्यालय रहेको घोडेटार बजारका स्थानीय सुन्दर श्रेष्ठ केन्द्रीय प्रसारण लाइन भरपर्दो नभएको बताउँछन् ।
गाउँपालिका अध्यक्ष प्रेमकुमार राईका अनुसार ४, ५, ६, ७ र ८ वडामा बिजुली पुगेको छैन । आफ्नै वडामा बिजुली पुग्न नसकेको गाँउपालिका अध्यक्ष राईले बताए । उनले भने, ‘पोल गाडिसकिएको छ । १० करोड बजेटमा स्थानीयबाट एक करोड लगानी हुन सकेमा भने बिजुली आउने भनिएको छ ।’
पछिल्लो जनगणनाअनुसार २० हजार ४ सय ४ जनसंख्या भएको गाउँपालिकाका सबै वडामा बिजुली पुर्याउन आफू क्रियाशील रहेको अध्यक्ष राईले बताए ।
पानी छ, व्यवस्थापन छैनदक्षिण भोजपुरको धनकुटा र उदयपुरसँग जोडिएको हतुवागढी गाउँपालिकामा पानीको स्रोतको समस्या नभएको अध्यक्ष राईले बताए । उनले भने, ‘हामीसँग गाउँपालिकामा पानीको समस्या छैन । राम्रो व्यवस्थापन हुन नसकेको मात्रै हो ।’