काठमाडौं : गोंगबुको नयाँ बसपार्कस्थित पूर्विय चन्द्रमा गेष्ट हाउसमा शंकास्पद बस्तु फेला परेपछि बम हुन सक्ने आशंकामा सेनाको टोली खटिएको छ।
सोमबार बिहान गेष्ट हाउसको सात नम्बर कोठामा रातो कपडाले बेरेको संकास्पद बस्तु देखिएपछि प्रहरीलाई खबर गरिएको थियो। महानगरीय प्रहरी परिसर टेकुबाट खटिएको टोली गेष्ट हाउस पुगेर घटनास्थलको निरीक्षण गरेको थियो। त्यो बस्तु लिन दिनभर कोही नआएपछि प्रहरीले पनि पोको खोल्न मानेन र बम पनि हुनसक्ने आशंका गर्दै सेनाको सहयोगका लागि आग्रह गरेको थियो।
नेपाली सेनाको बम डिस्पोजल टोली घट्नास्थल पुगेर डिस्पोज गर्दा सर्फ र सिसाको टुक्रा मात्र भेटिएको महानगरीय प्रहरी परिसरका प्रमुख एसएसपी बशन्त लामाले नेपाल समयसँग बताए। प्रहरीको अनुसन्धानबाट होटेलमा बस्ने एकजना ग्राहकले मालिकसँगको झगडापछि सिशा र सर्फ राखेर रातो कपडाले बेरेर बमजस्तै पारेर छोडेको खुलासा भएको छ। बमजस्तो डल्लो कोठामा छोडेर फरार हुने युवको खोजी भइरहेको र उनको कल डिटेलसमेत पत्ता लागेको जानकारी प्रहरीले दिएको छ।
बिहान ११ बजेदेखि करिब दुई घन्टा यही रातो पोकाका कारण यो क्षेत्रमा तनाव र त्रास छायो। बिहान होटेलको सात नम्बर रुम बुक गरेका एकजना युवक केही समयपछि अचानक बाहिरिएका थिए। त्यसपछि कोठामा गएर हेर्दा त्यस्तो बस्तु देखिएको थियो।
प्रकाशित: Dec 31, 2017| 18:23 आइतबार, पुस १६, २०७४