डोल्पामा सोमबार भएको जीप दुर्घटनाको विषयलाई लिएर सदरमुकाम दुनैमा तनाव भएको छ । घटनाका आफन्तहरुको आन्दोलन उग्रबन्दै गएपछि प्रहरीले तीन राउन्ड आश्रुग्याँस प्रहार गरेको छ ।
आन्दोलनकारीहरुले प्रहरीका ६ वटा गाडीमा तोडफोड गरेपछि प्रहरीले आश्रुग्याँस प्रहार गरेको जिल्ला प्रहरी कार्यालय डोल्पाका प्रहरी नायव उपरिक्षक अवदेश बुढाक्षेत्रीले जानकारी दिए । उनका अनुसार आन्दोलनकारीहरुलाई तिरबितर पार्न आश्रुग्यास प्रहार गरिएको हो ।
मृतकका आफन्त, गाडी धनी र प्रशासनसँग भएको वार्तामा क्षतिपूर्तिका विषयमा कुरा नमिलेपछि आन्दोलनकारीहरुले गाडी तोडफोड गरेका हुन् । क्षतिपूर्ति नदिएपछि मृतकका आफन्तहरुले शव बुझ्न मानेका छैनन् ।
आन्दोलनकारीहरुले डोल्पामा गाडी चलाउन बन्द गरिनुपर्ने, मृतकका आफन्तहरुलाई उचित क्षतिपूर्ति दिनुपर्ने, चालकलाई जेल हालिनुपर्ने र घटनाको छानविन गर्न उच्चस्तरिय समिति गठन गर्नुपर्ने लगायका मागहरु राखी आन्दोलनमा उत्रिएका हुन् ।
मृतक र घाइतेका आफन्तहरुले प्रशासनले रुडपरमिट बिनानै गाडी चलाउने अनुमति दिएका कारण घटना भएको बताएका छन् । सोमबार डोल्पामा भएको जीप दुर्घटनामा १० जनाको मृत्यु भएको थियो । अहिले माग सम्बोधन गर्ने विषयमा जिल्ला प्रशासन कार्यालयमा पुनःवार्ता सुरु भएको छ ।
प्रकाशित: Dec 31, 2017| 18:23 आइतबार, पुस १६, २०७४