काठमाडौं-निर्माण व्यवसायी महासंघका तत्कालीन अध्यक्ष शरदकुमार गौचन हत्यामा संलग्न भएको आरोपमा प्रहरीले माया शेरचनलाई पक्राउ गरेको छ । गौचन हत्याका मुख्य योजनाकार भनिएका गुन्डा नाइके समीरमान बस्नेतकी पत्नी मायालाई महानगरीय अपराध महाशाखाले आइतबार राजधानीको ठूलो भर्याङबाट पक्राउ गरेको हो ।
सोही प्रकरणमा गत सोमबार पक्राउ परेका अमर रानामगरले व्यवसायी गौचनलाई आफूले गोली प्रहार गरी हत्या गरेको र हतियार मायाले उपलब्ध गराएको बयान अदालतमा दिएको आधारमा काठमाडौं जिल्ला अदालतले मायालाई पक्राउ गर्न महाशाखालाई पुर्जी जारी गरेको थियो ।
गौचन हत्याका मुख्य योजनाकार भनिएका समीरमान पक्राउ परेपछि मायाले राजधानीमा गुन्डागर्दी र हप्ता असुली चलाइरहेको प्रहरी स्रोतको दाबी छ । समीरमान अहिले नख्खु कारागारमा छन् ।
उनले पत्नी मायाको सहयोगमा राजधानीमा हाइप्रोफाइल हत्याको योजना बनाइरहेका बेला गौचन हत्या योजनामा संलग्न रहेको आरोपमा लोप्साङ भनिने सोम तामाङ, रोशन बुढाथोकी र अमर रानामगरलाई महाशाखा टोलीले सोमबार झापाको काँकडभिट्टाबाट पक्राउ गरेको थियो ।
प्रकाशित: Dec 31, 2017| 18:23 आइतबार, पुस १६, २०७४