निर्मला हत्या : सय दिन त्यत्तिकै खेर, इन्टरपोल गुहारियो 

काठमाडौं- कञ्चनपुरकी १३ वर्षीया निर्मला पन्तको बलात्कारपछि हत्याका सम्बन्धमा अनुसन्धान गर्न गठित विभिन्न सातवटा समितिहरू घटनाको दोषी पहिचान गर्न विफल भएपछि नेपाल प्रहरीले अन्तर्राष्ट्रिय अपराध प्रहरी संगठन (इन्टरपोल) को सहयोग मागेको छ । महेन्द्रनगरको ओपेरा होटेलमा सिसी क्यामेराको डिलेट भएको भिडियो रिकभर गर्नका लागि इन्टरपोलसँग सहयोग मागेको कञ्चनपुर प्रहरीका प्रवक्ता डिएसपी कृष्ण ओझाले बताए । 

बर्खास्त भएका एसपी डिल्लीराज बिष्टका छोरा किरणले उक्त होटलमा केही युवतीको फोटोसुट गरेका थिए । स्थानीय बासिन्दाले निर्मला पनि त्यस दिन होटेलमा गएको आशंका गरेका छन् । यो भिडियो रिकभर भए नयाँ तथ्य खुल्न सक्ने प्रहरीको अनुमान छ ।

निर्मला हत्याका सम्बन्धमा विभिन्न कोणबाट अनुसन्धान गरिए पनि नयाँ तथ्य फेला पर्न नसकेको डिएसपी ओझाले बताए । उनले भने, ‘अझै गहिरिएर अनुसन्धान गर्ने काम भइरहेको छ तर हत्याबारे नयाँ क्लु केही भेटिएको छ्रैन।’ निर्मलाको हत्या भएको शुक्रबार सय दिन पुगेको छ । घटनाको दोषी पत्ता लगाउन गरिएका अनुसन्धानको उपलब्धि शून्य रहेको छ ।

डिएसपी ओझाका अनुसार अहिलेसम्म प्रहरीले शंकाको घेरामा रहेका डेढ सयभन्दा बढीलाई सोधपुछ गरिसकेको छ । शंकास्पद विभिन्न व्यक्तिलाई निगरानीमा राखेर अनुसन्धान भइरहेको जानकारी उनले दिए । 

यस्तै प्रहरीले शंकास्पद व्यक्तिको डिएनए परीक्षणलाई तीव्र पारेको छ । प्रहरीले गत साता थप चार जनाको रगतको नमुना लिएर डिएनए परीक्षणका लागि राष्ट्रिय विधिविज्ञान प्रयोगशालामा पठाएको छ । अन्य शंकास्पद व्यक्तिको पनि डिएनए नमुना लिने तयारीमा रहेको कञ्चनपुर प्रहरीले जनाएको छ । अनुसन्धानका लागि प्रहरीले यसयअघि नै शंकास्पद ५ व्यक्तिको डिएन परीक्षण गरिसकेको छ । तर अहिलेसम्म  भएका  यी  अनुसन्धान र सोधपुछबाट प्रहरीले दोषी पत्ता लगाउन सकेको छैन ।

गत साउन १० गते घरबाट पढ्न भनेर साथीकहाँ पुगेकी निर्मलाको ११ गते बलात्कारपछि हत्या गरिएको अवस्थामा शव फेला परेको थियो । 

शव भेटिएसँगै एउटा उच्चस्तरीय छानबिन समितिसहित सातवटा अनुसन्धान टोली बने पनि अझै हत्यारा पत्ता लाग्न सकेको छैन । सय दिन पूरा हुँदा पनि अपराधी पत्ता लगाउन नसकेको भन्दै प्रहरी प्रशासन र सरकारको चर्को आलोचना भइरहेको छ । प्रहरीले आफ्नै तरिकाले गरेका अनुसन्धान र सरकारद्वारा गठित उच्चस्तरीय छानबिन समितिले शंकास्पद देखाएका सबै व्यक्तिसँग सोधपुछ गरिए पनि अहिलेसम्म ठोस तथ्य फेला पर्न सकेको छैन ।

निर्मला हत्याको प्रमाण नष्ट गरेको भन्दै गृह मन्त्रालयले कञ्चनुरका तत्कालीन प्रहरी प्रमुख एसपी डिल्लीराज बिष्ट र इन्स्पेक्टर जगदीशप्रसाद भट्टलाई सेवाबाट बर्खास्त गरिसकेको छ । तर कञ्चनपुरका स्थानीय र निर्मलाका आफन्तले उनीहरुलाई हिरासतमा राखे थप अनुसन्धान गर्नुपर्ने माग गर्दै आएका छन् । 

घटनापछि निर्मलाका निम्ति न्याय माग्दै कञ्चनपुर, काठमाडौंलगायत देशका अधिकांश स्थानमा प्रदर्शन भएका छन् । कञ्चनपुरमा भएको प्रदर्शनमा प्रहरीले गोली चलाउँदा एक किशोरको मृत्यु भएको  थियो भने कैयन् व्यक्ति घाइते भएका थिए । 

सामाजिक अभियन्ताले निर्मला हत्याको सय दिन पुगे पनि अझै हत्यारा पत्ता लगाउन नसकेको भन्दै सरकारको विरोधमा कार्यक्रम गर्ने भएका छन् । निर्मलाको सम्झना र सरकारको विरोधमा शुक्रबार ललितपुरस्थित पाटनको कृष्ण मन्दिरमा दीप प्रज्वलन गरिने गरिने भएको छ ।