काठमाडौँ- छातीमा सङ्क्रमण भएपछि अस्पताल भर्ना भएका प्रधानमन्त्री केपी शर्मा ओलीलाई शुक्रबार डिस्चार्ज गर्ने तयारी भएको छ ।
बिहीबार सबै रिपोर्टहरु सामान्य देखिएपछि चिकित्सकहरुले प्रधानमन्त्रीलाई शुक्रबार साँझसम्म डिस्चार्ज गर्ने तयारी गरेका हुन ।
चिकित्सकका अनुसार उनी अहिले करिब सामान्य अवस्थामा आएका छन् । तर, उनलाई आरामको भने जरुरत रहेको उनीहरुको भनाइ छ ।
रगतमा चिनीको मात्रा सन्तुलित भएपछि प्रधानमन्त्रीलाई दिँदै आएको इन्सुलिन पनि बिहीबारदेखि बन्द गरिएको छ । उनको खोकी पनि पूर्ण रुपमा ठिक भएको प्रधानमन्त्रीको उपचारमा संलग्न डा अरुण सायमीले जनाएका छन् ।
छातीको सङ्क्रमण, ज्वरो र खोकी बढेपछि गत सोमबार महाराजगञ्जस्थित त्रिवि, चिकित्सा शास्त्र अध्ययन संस्थान, मनमोहन कार्डियोथोरासिक भास्कुलर तथा ट्रान्सप्लाण्ट सेण्टरमा प्रधानमन्त्री ओलीलाई भर्ना गरिएको थियो ।
उनको उपचारमा मुटुरोग विशेषज्ञ डा अरुण सायमीको संयोजकत्वमा डा दिव्यासिंह शाह तथा छातीरोग विशेषज्ञ डा सन्तकुमार दासको टोली संलग्न छ ।
प्रकाशित: Dec 31, 2017| 18:23 आइतबार, पुस १६, २०७४