धनुषाको हंसपुर नगरपालिकाका मेयरमाथि हातपात

जनकपुरधाम- धनुषाको हंसपुर नगरपालिकाका मेयर रामज्ञान मण्डलमाथि हातपात भएको छ । आफ्नो कार्यकक्षमा बसिरहेका बेला मेयर मण्डलमाथि बुधबार हातपात भएको हो।

आफूमाथि उपभोक्ता समितिका अध्यक्ष हंसपुर–४ बस्ने रामहृदय मण्डल र स्थानीय दीपनारायण यादवले हातपात गरेको भन्दै मेयर मण्डलले विहिबार जिल्ला प्रहरी कार्यालय धनुषामा जाहेरी दर्ता गरेका छन् । यसैगरी मेयर मण्डललाई हातपातबाट बचाउने क्रममा स्थानी विजय मण्डललाई पनि चोटपटक लागेको छ।

मण्डलले जाहेरी दर्ता गरे लगत्तै प्रहरीले दुबै आरोपीविरुद्ध सार्वजनिक अपराधको मुद्दा दर्ता गरेको बताइएको छ। बाटो ग्रभेल गरेको लामो समय बितिसक्दा पनि मेयर मण्डलले भुक्तानी दिन नमानेपछि उपभोक्ता समिति अध्यक्ष यादव उनीविरुद्ध खनिएका हुन्।

विगत अषाढमै ग्रभेलको काम सकिएपनि मेयर मण्डलले भुक्तानी दिन नमानेको उनको आरोप छ। तर मेयर मण्डलले भने काममा त्रुटी गरेको शंका लागेका कारण केहि उपभोक्ता समितिको भूक्तानी रोकिएको र छानबिनपछि मात्र भुक्तानी दिने निर्णय भएको बताएका छन्।