उदयपुर- सर्वोच्च अदालतका वरिष्ठतम न्यायाधीश प्रकाशमानसिंह राउतकी पत्नी ललिता उदयपुरबाट पक्राउ परेकी छन् । न्यायाधीश पतिको हस्ताक्षर र औंठाछाप किर्ते गरेको आरोपमा उनलाई इलाका प्रहरी कार्यालय कटारीले पक्राउ गरेको हो ।
उनीसंगै उनका दाजुभाउजू पनि पक्राउ परेका छन् । पक्राउ पर्नेमा ललितका दाजुहरु बाबुराम चौहान र शिवशंकर चौहान तथा भाउजू बुनु चौहान छिन् । अर्की भाउजू भोजकुमारी फरार रहेको प्रहरीले जनाएको छ । उनीहरुलाई सोमबारै पक्राउ गरिए पनि अदालतबाट म्याद लिएपछि बुधबार मात्रै यो घटना सार्वजनिक गरिएको हो ।
ललिताले पतिको हस्ताक्षर र औंठाछाप किर्ते गरी अर्काको बच्चालाई आफ्नो बनाई जन्मदर्ता गराएको भन्दै न्यायाधीश राउतका पिता बलबहादुरले उजुरी दिएका थिए ।
उनीहरू चारै जनाको मिलेमतोमा कटारी–३ बाट गत असोजमा बाबु प्रकाशमानसिंह, आमा ललिताकुमारी र बाजे बलबहादुर राउत उल्लेख गरी नवजात शिशुको जन्मदर्ता बनाएको आरोप छ ।
प्रकाशित: Dec 31, 2017| 18:23 आइतबार, पुस १६, २०७४