बारा- प्रहरीले बाराबाट हत्याका फरार चार अभियुक्तलाई पक्राउ गरेको छ।
कलैया उपमहानगरपालिका-२३ कोईरिया टोल बस्ने ६५ वर्षीय नन्दलाल राउत कुर्मीको हत्याका फरार अभियुक्त मध्ये चार जनलाई प्रहरीले नियन्त्रणमा लिएको हो। नन्दलालको १० कार्तिकमा घाँटी काटेर हत्या भएको थियो।
पक्राउ पर्नेमा कलैया–२३ बस्ने ४५ वर्षीय वीरेन्द्र पटेल र बारा जिल्ला साविक गाविस अमृतगंज-९ बस्ने ५५ वर्षीय रामअयोध्या दास रहेका छन्। यसैगरी घटनामा संलग्न भनिएका बीरेन्द्रका १९ वर्षीय छोरा विशाल पटेल र सोहि ठाउँ बस्ने ६५ वर्षीय बैजनाथ राउत कुर्मीसमेत पक्राउ परेको प्रहरीले जनाएको छ। पक्राउ परेकाहरु नन्दलालका छिमेकी रहेको प्रहरीले जनाएको छ।
कुनै सन्तान नरहेका नन्दलाल कान्छो भाइ अम्बिका राउतसँग सगोलमा बस्दै आइरहेका थिए। आर्थिक हिसाबले सुखीसम्पन्न रहेका नन्दलाल अधिकांश समय गोठघर र गोठघर नजिकै रहेको करेसाबारीमा बिताउने गरेका प्रहरीको अनुसन्धानबाट खुलेको छ।
पक्राउ परेकाहरु विरुद्ध कर्तव्य ज्यान मुद्दा दर्ता गराई थप अनुसन्धान कार्य भइरहेको बाराका डीएसपी रन्जितसिंह राठौरले जनाएका छन्।
प्रकाशित: Dec 31, 2017| 18:23 आइतबार, पुस १६, २०७४