बुटवलको दोस्रो जित, पोखरा ३३ रनले पराजित

पोखरा- पोखरामा जारी सर्वाधिक पुरस्कार राशीको पोखरा प्रिमियर लिग (पीपीएल) टी-२० क्रिकेट अन्तर्गतको जारी खेलमा बुटवल ब्लास्टरले पोखरा पल्टनलाई पराजित गरेको छ । 

बुटवलले पोखरालाई ३३ रनले पराजित गरेको हो । यस जितसँगै बुटवलले प्रतियोगितामा लगातार आफ्नो दोस्रो जित निकालेको छ । बुटवलले दिएको १ सय ५१ रनको लक्ष्य पोखराले निर्धारित ओभरमा ९ विकेट गुमाउदै ११७ रन मात्र बनाउन सक्यो । 


पोखराका लागि आसिफ शेखले २० रन जोड्दा कप्तान शरद भेषवाकरले १९ रन बनाए । त्यस्तै रबी इन्दर सिंह र मोहमद नाभिदले समान ११-११ रन जोड्दा राशिद खानले १० रन बनाए । 

पोखरालाई सस्तैमा समेट्न बुटवलका सोमपाल कामी, रोहन मुस्तफा, ललित भण्डारी र विपिन खत्रीले समान २-२ विकेट लिए ।

यसअघि टस जितेर ब्याटिङ गर्ने निर्णय गरेको बुटवलले निर्धारित २० ओभरमा ७ विकेट गुमाउदै १ सय ५० रन बनाएको हो । बुटवलका भिमले ४६ बलमा दुई चौका र तीन छक्ककाको मद्दतमा ५४ रन जोडे । 


त्यस्तै कप्तान सोमपाल कामीले ८ बलमा बिस्फेटक ब्याटिङ गर्दै दुई चौका र एक छक्काको मद्दतमा २२ रन जोडेका थिए । रोहन मुस्तफाले ४५ रन जोडे । उनले ३५ बल खेल्दै तीन चौका र दुई छक्काको मद्दतमा ४५ रन जोडेका थिए । 

सिद्धान्त लोहनिले १३ जोडे । पेखराका लागि मोहमद नाभिदले दुई विकेट लिदाँ, महबुब आलम, ललितराज वंशी, शरद भेसवाकरले समान एक एक विकेट लिएका थिए ।