काठमाडौं- भारतीय कम्युनिस्ट पार्टी (मार्क्सवादी) का महासचिव सीताराम यचुरीले नेपालको लोकतान्त्रिक आन्दोलनमा कम्युनिस्ट संगठनको हैसियतले नेपालमा कम्युनिस्ट सरकार बन्नु ऐतिहासिक घटना भएको बताएका छन्।
पुष्पलाल स्मृति प्रतिष्ठानले शुक्रबार राजधानीमा आयोजना गरेको भारतीय कम्युनिस्ट आन्दोलन विषयक प्रवचन कार्यक्रममा यचुरीले आममुक्तिगामी जनताका लागि अब काम गरेर देखाउनु पर्ने ऐतिहासिक जिम्मेवारी आएको बताएका हुन्।
‘नेपाली कम्युनिस्ट आन्दोलनको महत्वपूर्ण कालखण्डमा नेकपामा सरकारमा पुगेर एउटा सफलता प्राप्त गरेको छ, तर दक्षिण एसियाकै पुरानो पार्टी १९२० तिर गठन भए पनि खास काम गर्न सकेको छैन’, यचुरीले भने ‘गतिविधिको हिसावले आमभारतीय श्रमजीवि जनतामा भारतीय कम्युनिष्ट पार्टीको खास उल्लेखनीय असर पर्न सकेको छैन।’
यचुरीले भाकपाभन्दा पछि स्थापना भएको चिनियाँ कम्युनिस्ट पार्टीले आफ्नो स्थापनाको २८ बर्षभित्रमा चीनमा जनवादी क्रान्ति सफल गरे पनि भाकपाले सामाजिक परिवर्तनको कार्यमा उल्लेखनीय भूमिका खेल्न नसकेको स्वीकारे।
माजवादी विचाराधार अवलम्बन गर्ने सम्पूर्ण राजनीतिक संगठनको समेत नेपालको लोकतान्त्रिक आन्दोलनमा कम्युनिस्ट संगठनको हैसियतले आफूहरु सहयोग गर्न तयार रहेको उनले विश्वास दिलाए।
नेपाली कम्युनिस्ट आन्दोलनको महत्वपूर्ण कालखण्डमा नेकपा सरकारमा पुगेकोले स्वामित्व रहने खालको परिवर्तनमा नेकपाले अग्रसरता लिनुपर्नेमा जोड दिए।
सो अवसरमा भाकपाका पोलिटव्युरो सदस्य जोगिन्दर शर्मा, नेपाल कम्युनिस्ट पार्टीका वरिष्ठ नेता तथा पूर्वप्रधानमन्त्री माधवकुमार नेपाल, पूर्वउपप्रधानमन्त्री भीम रावल, नेकपाका नेताहरु सुरेन्द्र पाण्डे, दिनानाथ शर्म, पम्फा, देवेन्द्र पौडेल लगायतको प्रवचन कार्यक्रममा उपस्थिति थियो।
प्रकाशित: Dec 31, 2017| 18:23 आइतबार, पुस १६, २०७४