प्रहरीको मनोबल खस्किन दिन्‍नँ- आईजीपी खनाल

काठमाडौं- नेपाल प्रहरीका महानिरीक्षक सर्वेन्द्र खनालले पछिल्ला केही घटनाले प्रहरीको मनोबल खस्कन लागेको बताउँदै मनोबल उच्च राखेर जनताको शान्ति सुरक्षामा प्रतिबद्ध हुन निर्देशन दिएका छन्।

६३ औं प्रहरी दिवसको अवसरमा बोल्दै खनालले १/२ घटनालाई लिएर सिंगो प्रहरीमाथि प्रश्न उठाउनु कति जायज छ भनी प्रतिप्रश्न गरे। आतंकवाद र संगठित अपराधीले अत्याधुनिक प्रविधी प्रयोग गरिरहेका बेला नेपाल प्रहारी भाडाको छाप्रोमा बिनासाधन-स्रोत १८ घण्टा ड्युटी गर्न बाध्य रहेको उनले बताए। प्रहरीलाई साधन-स्रोत उपलब्ध गराउन खनालले सरकारलाई आग्रह गरे।

गृह मन्त्रालयले अगाडि सारेको ८२ बुँदे कार्ययोजनालाई अक्षरशः पालना गरिएको बताउँदै आईजीपी खनालले भ्रष्टाचारमा शून्य सहनशीलता अपनाउन मातहतका प्रहरीलाई निर्देशन दिए। प्रहरीमाथि असीमित जिम्मेवारी रहेकाले नागरिकको सहयोगबिना अनुसन्धान चुस्त बनाउन नसकिने खनालले बताए। प्रहरीको सक्रियताले यौन दूराचारी, सिरियल किलर, भूमिगत आपराधिक गिरोह, लागूऔषध कारोबार र अवैध चन्दा आतंक न्यून रहेको उनको दाबी थियो।

खुला सिमानाका कारण नेपालमा अपराध गरेर दोस्रो देश जाने गरेकाले नेपाल प्रहरीलाई चुनौती थपिएको खनालले बताए।