जयसिंह धामी बेपत्ता घटनाको छानबिन टोली धनगढीमा

धनगढी– दार्चुलामा भारतीय सीमा सुरक्षा बल (एसएसबी) ले तुइन फुकालिदिएपछि बेपत्ता जयसिंह धामी घटनाको छानबिनका लागि गठित गृह मन्त्रालयका सहसचिव जनार्दन गौतम नेतृत्वको टोली धनगढी आइपुगेको छ। 

बैतडी हुँदै सुदूरपश्चिम प्रदेशको अस्थायी मुकाम धनगढी पुगेको टोली सुदूरपश्चिम प्रदेशका मुख्यमन्त्री त्रिलोचन भट्ट र आन्तरिक मामिला तथा कानुनमन्त्री पूर्णा जोशीसँग भेट गरेको छ।

भेटका क्रममा छानबिन टोलीले दार्चुलामा रहेर गरेका कामको बारेमा मुख्यमन्त्री भट्ट र काननुमन्त्री जोशीलाई जानकारी गराएको छ। मन्त्री जोशीले गृहको टोलीले दार्चुलामा सरोकारवाला निकाय, पीडित परिवार, प्रत्यक्षदर्शीसँग भेटघाट तथा छलफल, घटनास्थलको अवलोकन गरेको विषयमा जानकारी गराएको बताइन्। 'टोलीलाई सीमा सुरक्षा, भारतीय पक्षले सीमा नाकामा दिने सास्ती लगायतका विषयमा जानकारी गराएको छु’, जोशीले भनिन्, ‘अगामी दिनमा यस्ता घटना दोहोरिन नदिन सरकार गम्भीर बन्नुपर्ने सुझावसमेत दिएको छु।’

बैतडी र डडेल्धुरामा महाकाली नदीको तटीय क्षेत्रको निरीक्षण गरेर फर्किएको टोली आज नै कञ्चनपुर जाने बताइएको छ। 

छानबिन टोलीका सदस्यसमेत रहेका सुदूरपश्चिम प्रदेशका प्रमुख प्रहरी नायब महानिरीक्षक (डीआईजी) पुरुषोत्तम कँडेलले कञ्चनपुरमा पनि महाकाली नदीको तटीय क्षेत्रको निरीक्षण गर्ने कार्यक्रम रहेको बताए।

साउन १५ गते भारतीय भूमि प्रयोग गरेर दार्चुला सदरमुकाम खलंगा आउने क्रममा महाकाली नदीमा तुइन तर्ने क्रममा एसएसबीले तुइन फुकालिदिएपछि खसेर दार्चुलाको व्याँस गाउँपालिका वडा नम्बर २ का ३३ वर्षीय जयसिंह धामी बेपत्ता भएका थिए। उनी अहिलेसम्म फेला परेका छैनन्।