काठमाडौं- आईसीसी विश्व टी-२० एसिया छनोट समूह ‘बी’ अन्तर्गत नेपालले आफ्नो पाँचौ खेलमा चीनसँग पहिले फिल्डिङ गर्दै छ । क्वालालम्पुरस्थित वायुमस ओभलमा टस जितेर नेपालले पहिलो फिल्डिङ गर्ने निर्णय गरेको हो ।
अघिल्ला चार खेलमा लगातार जित निकाल्दै दोस्रो चरणमा पुगिसकेको नेपालले पाँचौ खेलमा चीनको सामना गर्न लागेको हो । नौलो प्रतिद्वन्द्वी चीनविरुद्ध मैदान उत्रदा नेपालको लक्ष्य लगातार पाँचौ जित निकाल्नु हुनेछ ।
जारी छनोट प्रतियोगितामा नेपाल र चिनको अहिले सम्मको नतिजा हेर्दा नेपालले लगातार जित निकालिरहेको छ भने चीनले अहिलेसम्म जित निकाल्न सकेको छैन । छनोटमा नेपाल ४ खेलबाट ८ अंक जोडेर शीर्ष स्थानमा छ । यता, चीन भने ४ खेलमा चार हार बेहोर्दै तालिकाको पुछारमा रहेको छ ।
नेपाल र चीनको पुरुष टिमले पहिलोपटक प्रतिस्पर्धा गर्न लागेका हुन् । महिला क्रिकेटमा नेपाल र चीनबीच प्रतिस्पर्धा भईसकेको छ । तर, पुरुष क्रिकेटमा पहिलोपटक प्रतिस्पर्धा हुन लागेको हो ।
चीनपछि नेपालले अन्तिम खेलमा शुक्रबार सिङ्गापुरसँग खेल्नेछ । छनोटबाट शीर्ष तीन टोलीले एसिया छनोटको दोस्रो चरणमा स्थान बनाउने छन् । एसिया छनोटबाट शीर्ष दुई टोलीले विश्वकपमा स्थान बनाउने छन् ।
एसिया छनोटमा ७ टोलीले खेल्नेछन् । अष्ट्रेलियामा हुने टी-२० विश्वकप सन् २०२० को अक्टोबर १८ देखी १५ नोभेम्बरसम्म हुनेछ । जसमा १६ टोलीले खेल्नेछन् ।
प्रकाशित: Dec 31, 2017| 18:23 आइतबार, पुस १६, २०७४