काठमाडाैं- पार्टी भित्रको विवाद मिलाउन बसेको नेकपाको सचिवालय बैठक ठोस निष्कर्ष बिना नै सरेको छ । करिब ३ घण्टा बालुवाटारमा छलफल भएपनि पार्टीको विवाद साम्य हुन नसकेपछि २४ गते बुधबारसम्मका लागि बैठक स्थगित गरिएको हो ।
बैठकपछि सन्चारकर्मीसँग कुरा गर्दै पार्टी प्रवक्ता नारायणकाजी श्रेष्ठले सोमबारको बैठकले केही कार्यसूची तय गरेको र बुधबारका लागि पुनः बैठक डाक्ने निर्णय भएको जानकारी दिए । उनका अनुसार पार्टीका असन्तुष्टि, केन्द्रीय कार्यालय व्यवस्थापन, प्रदेश कमिटिलाई पूर्णता तथा जिल्ला कमिटि गठन, पार्टी, संसद र सरकारका कामकारवाहीको समीक्षालगायतका कार्यसूची बैठकले तय गरेको छ ।
बैठकमा बरिष्ठ नेता माधव नेपालको असन्तुष्टिका विषयमा पनि छलफल भएको स्रोतले जनाएको छ। प्रदेश अध्यक्ष तथा इञ्चार्ज तोकिएको विषयमा वरिष्ठ नेता नेपालले पार्टी नेतृत्वको चर्को आलोचना गर्दै आएका थिए । आफू विदेशमा रहेका बेला जिम्मेवारी तोकिएको भन्दै उनले नेतृत्वको आलोचना गर्दै आएका छन्। पछिल्लो समय उनले पार्टी नेतृत्व र सरकारबारे सार्वजनिक रुपमा आलोचना गर्दै आएका छन्।
सोमबारको बैठकमा प्रधानमन्त्री एवं पार्टी अध्यक्ष केपी ओलीले राष्ट्रसंघ महासभा तथा कोस्टारिकाको भ्रमणका बारेमा जानकारी गराएका थिए । उनले भ्रमण सफल भएको र दुई पक्षीय सम्बन्ध विस्तार भएको पनि बताएको प्रवक्ता श्रेष्ठले जानकारी दिए । यस्तै अध्यक्ष पुष्पकमल दाहाल, वरिष्ठ नेता माधवकुमार नेपाल र प्रवक्ता श्रेष्ठले आफूहरुले विभिन्न समयमा गरेका चीन भ्रमणका बारेमा जानकारी गराएका थिए ।
प्रकाशित: Dec 31, 2017| 18:23 आइतबार, पुस १६, २०७४