काठमाडौं-मलेसियामा जारी टी-२० विश्वकप छनोट अन्तरगत नेपाल राष्ट्रिय क्रिकेट टोलीले लगातार दोस्रो जित दर्ता गरेको छ । आफ्नो दोस्रो खेलमा नेपाली टोलीले घरेलु टोली मलेसियालाई ८ विकेटले पराजित गर्दै लगातार दोस्रो जित दर्ता गरेको हो ।
१ सय १ रनको सामान्य लक्ष्य पछ्याएको नेपाल १२.४ ओभर मात्र २ विकेट गुमाउँदै सहज जित निकालेको हो । नेपालका लागि कप्तान पारस खड्काले आक्रमक अर्ध शतकिय पारी खेले । सुरुवाती दुई ओभर सम्म रोकेर ब्याटिङ गरेका पारसले त्यसपछि आक्रमक ब्याटिङ गरेका थिए ।
दोस्रो ओभरमै ओपनर अनिल शाह १ रनमा पेभिलिएन फर्किएपछि पारस तेस्रो नंबरमा ब्याटिङ गर्न मैदानमा आएका थिए । उनले ३७ बलमा २ छक्का र ५ चौकार प्रहार गर्दै ५२ रनमा नट आउट रहे । छक्का हान्दै खेल जिताएका ज्ञानेन्द्र मल्लले पनि आक्रमक ब्याटिङ गरे ।
मल्लले २४ बलमा २ चौका र १ छक्का प्रहार गर्दै २७ रनमा नट आउट रहे । ओपनर विनोद भण्डारीले १२ रन बनाउन सके । मलेसियाका पवनदिप सिंह र सिजर्रल आइड्रसले समान एक विकेट हात पारे ।
यस अघि टस जितेर पहिला ब्याटिङ गरेको मलेसियाले १९.३ ओभरमा १ सय रन बनाउँदै अल आउट भएको थियो । पहलो विकेटको लागि ओपनर सायिद अजिज र शफिक शरिफले ५ ओभरमा ३० रन को साझेदारी गर्दै मलेसियालाई गतिलो सुरुवात दिलाए पनि नेपाली लेग स्पिनर सन्दीप लामिछानेको घातक बलिङ सामु निरिह सावित भए ।
मलेसियाका ओपनर सायिद अजिज १३ र शफिक शरिफले ४९ रन बनाउन बाहेक मलेसियाका कुनै पनि ब्याटम्यानले दोहोरो अंक छुन सकेन । नेपालका लापग सन्दिप लामिछानेले ५ विकेट लिदाँ सोमपाल कामीले ३ र खड्काले १ विकेट लिए ।
प्रकाशित: Dec 31, 2017| 18:23 आइतबार, पुस १६, २०७४