एक महिनापछि बसेको प्रदेशसभा बैठक पाँच मिनेटमै सकियो

जनकपुरधाम-एक महिनापछि बसेको प्रदेश २ को प्रदेशसभा बैठक पाँच मिनेट बसेर सकिएको छ । १६ भदौपछि पहिलो पल्ट बिहीबार प्रदेशसभाको बैठक बसेको थियो । आन्तरिक मामिला तथा कानुनमन्त्री ज्ञानेन्द्रकुमार यादवले दुईटा विधेयक प्रस्तुत गरे लगत्तै शुक्रबार बिहान ११ बजेसम्म बैठक स्थगित भएको छ ।

कानुनमन्त्री यादवले गाउँ र नगरसभा कानुन निर्माण तथा करार कर्मचारी भर्ना सम्बन्धी बनेको विधेयक छलफलका लागि प्रदेशसभा बैठकमा प्रस्तुत गरेका छन् । शुक्रबार बस्ने बैठकमा दुबै विधेयक उपर छलफल शुरु हुने जनाइएको छ ।

प्रदेश सरकारले संसद सचिवालयमा प्रशासकीय कार्यविधि, सुशासन कायम गर्ने, प्रदेशसभा सचिवालय, मदर्सा बोर्ड गठन, यातायात व्यवस्थासहित ६ वटा विधेयक दर्ता गराएपनि बिहीबारको बैठकमा दुई विधेयकमात्र प्रस्तुत गरेको छ । अन्य प्रदेशहरुले स्थायी राजधानी र प्रदेश नामाकरणसम्बन्धी प्रस्ताव ल्याइरहँदा प्रदेश २ को लालबाबु राउत नेतृत्वको सरकारले यस विषयमा दलहरुसँग छलफलसमेत गर्न सकेको छैन् ।

प्रदेश सरकार कार्यान्वयनमा आएको आठ महिना बिति सकेपनि हालसम्म जम्मा १३ वटा विधेयकमात्र पारित भएको छ । प्रदेश सञ्चालनका लागि आवश्यक कानुनहरु निर्माण गर्न सरकारले विधेयक ल्याउन नसक्दा सदनको कारबाहीसमेत सुस्त भएको सांसदहरुको आरोप छ ।

अन्य प्रदेशहरुले स्थायी राजधानी र नामाकरणका विषयमा छलफल चलाइ रहेपनि प्रदेश २ मा दलहरुबीच छलफलसमेत हुन नसकेको कांग्रेस संसदीय दलका नेता रामसरोज यादवले बताए। राजधानी, नामाकरण, भाषालगायतको विषयमा छलफल गराउने जिम्मेवारी सरकारको रहेपनि त्यसतर्फ ध्यान नदिएको उनको आरोप छ ।